21 красавiка 2019, Нядзеля, 18:21
За нашу і вашу свабоду!
Рубрыкі

Нафта Brent абрынулася ніжэй за $70 упершыню за паўгода

8

Кошты нафты прадаўжаюць імкліва падаць, губляючы за месяц ужо больш за 18%.

На таргах у пятніцу ўпершыню з красавіка кошт гатунку Brent, да якога прывязаная палова глабальных фізічных паставак, упаў ніжэй за 70 даляраў, піша finanz.ru.

На 13.26 мск ф'ючэрсныя кантракты з пастаўкай у студзені ўкладаліся па 69,73 даляра за барэль, губляючы ў кошце 1,3% за дзень, 5,5% - з пачатку тыдня і больш за 15 даляраў у параўнанні з пікамі, паказанымі ў пачатку кастрычніка.

Амерыканскі эталон WTI таннее дзясяты дзень запар, чаго рынак не бачыў з 2014 года. У пятніцу каціроўкі апусціліся яшчэ на 1,3% і прабілі адзнаку 60 даляраў упершыню з лютага.

На рынку захоўваюцца асцярогі лішку, кажа аналітык Nordea Дзяніс Давыдаў: тры ключавыя здабываючыя краіны - ЗША, Саудаўская Арабія і Расея значна павялічылі пастаўкі.

Здабыча ў Штатах на мінулым тыдні падскочыла на 400 тысяч барэляў за дзень, устанавіўшы новы гістарычны рэкорд 11,6 млн барэляў на дзень.

Да канца года, на прагнозы амерыканскага Мінэнэрга, яна выйдзе на планку 11,8 барэляў, а налета перавысіць 12,5 мільёнаў барэляў штодня.

Саудаўская Арабія ўзняла вытворчасць з 9,8 барэляў у пачатку года да 10.7 мільёнаў на кастрычнік, а да канца года выйдзе на «ўстойлівую» планку 11 млн барэляў на дзень, папярэджваў кіраўнік Мінэнэрга каралеўства Халед аль-Фаліх.

Расея ўстанавіла постсавецкі рэкорд здабычы 11,4 млн барэляў на дзень, што, паводле звестак ЦДУ ТЭК, на 0,5 млн вышэй за паказчыкі пачатку года.

Рост здабычы, які пачаўся летам пасля патрабаванняў адміністрацыі Дональда Трампа і кангрэса, якія прыстрашылі АПЕК судом за маніпуляванне нафтавымі коштамі, наклаўся на паблажкі ў санкцыях супраць Ірана, адзначае Давыдаў: хоць нафтавае эмбарга адноўленае з 5 лістапада, 8 ключавых кліентаў Тэгерана атрымалі права закупляць да 1 млн барэляў на дзень.

Паводле ацэнкі амерыканскага Мінэнэрга, сусветны рынак «чорнага золата» ўжо знаходзіцца ў стане, калі здабыча перавышае попыт, і ў найбліжэйшыя тры кварталы гэты дысбаланс будзе толькі ўзмацняцца.

Цяпер «лішнімі» з'яўляюцца 170 тысяч барэляў здабычы на дзень, да канца года гэтая лічба вырасце да 690 тысяч барэляў, а да сярэдзіны 2019-га дасягне 1,19 барэляў - узроўню, які апошні раз назіраўся ў 2015 годзе, калі кошты ўпалі да 12 -гадовага мінімуму 27 даляраў за бочку Brent.

Праблема нафтавага рынку ў тым, што сланцавы бум у ЗША перакрывае ўвесь рост сусветнага попыту, адзначаюць аналітыкі Інстытута энэргетыкі і фінансаў.

Каб спыніць сланцавае цунамі, з іх разлікаў, кошты павінны ўпасці да 40-50 даляраў за барэль. У гэтым выпадку рост здабычы ў ЗША спыніцца да 2020-га года.