Галоўнага патолагаанатама Міністэрства аховы здароўя будуць судзіць за хабар на $180 тысяч

Ён прызнаў віну.

За атрыманне хабараў на агульную суму больш за 390 тысяч рублёў будуць судзіць былога кіраўніка Гарадскога клінічнага патолагаанатамічнага бюро. Паводле версіі следства, ён атрымліваў хабары ад пастаўшчыкоў рытуальных прыладаў і паслуг. Пра гэта паведамілі tut.by ў прэсе-службе Следчага камітэта.

Мужчыну затрымалі ў чэрвені 2018 года на працоўным месцы падчас атрымання хабару, паведамляў ГУБАЗіК МУС. У кайданкі закавалі кіраўніка Гарадскога патолагаанатамічнага бюро Аркадзя Пучкова, ён жа з'яўляўся галоўным патолагаанатамам Міністэрства аховы здароўя.

Паводле звестак следства, фігурант цягам 16 гадоў, са студзеня 2002 года, атрымліваў хабар ад прадстаўнікоў фірмаў і прадпрымальнікаў.

«За магчымасць пастаўляць патолагаанатамічнаму бюро прадукцыю (труны, драўляныя крыжы і іншае) для наступнай рэалізацыі праз краму рытуальных паслуг установы або надаваць паслугі ў перавозцы целаў памерлых да месцаў пахавання», - распавялі ў СК.

Падазраюць, што сума хабару складала 10% ад кошту тавару, а «тарыф» за перавозку целаў па 100 даляраў за адну машыну.

Следства таксама мяркуе, што фігурант атрымліваў грошы ад санітараў морга за падаўжэнне і ўкладанне працоўных кантрактаў, за дазвол надаваць грамадзянам платныя рытуальныя паслугі і іншае. За гэта яму належала 10% ад заробку работнікаў.

Ёсць таксама эпізод аб укладанні дамовы з дырэктарам фірмы на арэнду памяшкання бюро пад краму рытуальных паслуг. Начальнік, згодна з абвінавачваннямі, патрабаваў грошай за падаўжэнне дамоўленасцей, але пасля прадпрымальнік перастаў плаціць і страціў месца.

«Падчас расследавання былі ўстаноўленыя 24 эпізоды (...). Агульная сума незаконнага грашовага ўзнагароджання склала больш за 390 тысяч беларускіх рублёў», - распавялі ў Следчым камітэце.

Паведамляецца, што мужчына цалкам прызнаў віну. Падчас расследавання ён заплаціў у бюджэт усю магчымую суму злачыннага даходу.

Мужчына пад вартай, ягоныя дзеянні кваліфікаваныя на падставе ч.2, 3 арт.430 КК (Атрыманне хабару ў значнай і асабліва значнай сумах). Яму пагражае ад 5 да 15 гадоў зняволення.

Акрамя таго, на адрас камітэта аховы здароўя Менгарвыканкама ўнесенае прадстаўленне аб ліквідацыі прычын і ўмоў, якія садзейнічалі ўчыненню злачынства.