Кангрэс ЗША рыхтуе 10 законапраектаў супраць энэргетычнага сектара Расеі

Еўропу будуць вызваляць ад расейскай нафты і газу.

Кангрэс ЗША разглядае амаль дзесяць заканадаўчых ініцыятыў, накіраваных супраць энэргетычнага сектара Расеі і яе экспартных магчымасцяў, каб скараціць залежнасць Еўропы ад расейскай нафты і газу.

Пра гэта «Голасу Амерыкі» паведаміў высокапастаўлены прадстаўнік федэральнага ўрада.

«Думаю, ёсць блізу дзесяці законапраектаў, ключавым кампанентам якіх з'яўляецца расейская энэргетыка», - заявіў журналістам у панядзелак памочнік дзяржсакратара ў энергарэсурсах Фрэнк Фэнан.

«На сёння мы не можам каментаваць канкрэтныя элементы заканатворчасці, але мы адсочваем сітуацыю даволі ўважліва», - дадаў ён.

Першым на разглядзе заканадаўцаў знаходзіцца рэкамендацыйная рэзалюцыя, у якой Кангрэс выказвае непрыманне будаўніцтва трубаправода «Паўночны струмень-2», прызначаны для дастаўкі расейскага газу ў Нямеччыну па дне Балтыйскага мора.

Пастанова аб гэтай рэзалюцыі можа быць прынятая ўжо на гэтым тыдні, паведамляюць інфармаваныя крыніцы.

«Мы чакаем, што Кангрэс прыме пастанову аб гэтым пытанні і ціск на расейскі энэргетычны сектар у выніку будзе толькі ўзрастаць», - сказаў Фэнан.

«Паўночны струмень-2» падвоіць аб'ёмы прыроднага газу, які Расея можа пастаўляць наўпрост у Нямеччыну пад Балтыйскім морам, у абыход Украіны.

Чакаецца, што яго будаўніцтва будзе закончана не пазней 2019 года. Аб'ём прапампаванага газу ў краіны Еўразвязу можа скласці да 55 мільярдаў кубічных метраў.

Агульны кошт будаўніцтва «Паўночнага струменю-2» складае 9,5 мільярда еўраў.

«Газпрам» з'яўляецца адзіным акцыянерам праекта, які нясе палову гэтых выдаткаў. Заходнімі партнёрамі «Газпрама» з'яўляюцца нямецкія кампаніі Uniper і Wintershall, англа-галандская група Royal Dutch Shell, французская Engie і аўстрыйская OMV.

Фэнан заклікаў расейскіх партнёраў выйсці з гэтага прадпрыемства.

«Пазіцыя ЗША досыць ясная. Мы выступаем супраць «Паўночнага струменю -2» і заклікаем ўсе бакі выйсці з праекта», - сказаў ён.

Паводле ягоных слоў, «Паўночны струмень-2» з'яўляецца «інструментам, з дапамогай якога Расейская дзяржава хоча ўзмацніць залежнасць краін-імпарцёраў і прымусова ціснуць на іх».

«Непрыманне «Паўночнага струменю-2» Злучанымі Штатамі тлумачыцца нашай трывогай з нагоды таго, што трубаправод нясе шырокую геастратэгічных пагрозу еўрапейскай бяспекі, пра што мы ўвесь час кажам лідарам на ўсім кантыненце», - адзначыў памочнік дзяржсакратара.

Фэнан падкрэсліў, што «дыверсіфікацыя» энэргетыкі з'яўляецца ключом да захавання энэргетычнай незалежнасці Еўропы.

Ён згадаў некалькі праектаў, накіраваных на дасягненне гэтай мэты, будаўніцтва злучанага трубаправода (інтэрканэктара) паміж Грэцыяй і Балгарыяй, сінхранізацыю электрасетак краін Балтыі з кантынентальнай Еўропай і будаўніцтва тэрмінала для прыёму звадкаванага прыроднага газу (ЗПГ) на выспе Крк у Харватыі.

«Гэты тэрмінал мог бы атрымліваць ЗПГ ад шырокага кола пастаўшчыкоў. Гэта дазволіць павялічыць дыверсіфікацыю і адысці ад расейскіх крыніц, што будзе мець асаблівае значэнне для Вугоршчыны», - сказаў Фэнан.