Беларускі журналіст падаў у суд на «савет рэспублікі»

Уладзіміра Лапцэвіча не пусцілі на пасяджэнне, нягледзячы на выдадзены раней дазвол.

Журналіст інфармацыйнай кампаніі БелаПАН Уладзімір Лапцэвіч падаў у суд на «савет рэспублікі» нацыянальнага сходу Беларусі. У кастрычніку яго спачатку акрэдытавалі на пасяджэнне Міжпарламенцкай камісіі Савета Рэспублікі РБ і Савета Федэрацыі РФ у міжрэгіянальным супрацоўніцтве падчас правядзення V «Форуму рэгіёнаў» Беларусі і Расеі, які праходзіў у Магілёве, а затым адмовілі ў магчымасці прысутнічаць на мерапрыемствах.

Як інфармуе прэс-служба Беларускай асацыяцыі журналістаў, журналіст звяртаецца з пазовам аб прызнанні таго, што дзеянні службовых асоб «савета рэспублікі» супярэчаць заканадаўству. Лапцэвіч просіць суд абавязаць «савет рэспублікі» прынесці яму і БелаПАН прабачэнні за неправамерныя дзеянні службовых асоб, якія парушылі права журналіста на атрыманне інфармацыі.

Уладзімір Лапцэвіч некалькі разоў звяртаўся ў «савет рэспублікі», але так і не атрымаў выразнага адказу пра тое, на якой падставе яму было адмоўлена ў акрэдытацыі.

Як вядома, «Форум рэгіёнаў» у Магілёве наведвалі Аляксандр Лукашэнка і Уладзімір Пуцін.