Жыхары Будапешта выйшлі на пратэст праз змяненні ў працоўным кодэксе
6- 13.12.2018, 12:14
- 11,375
Удзельнікі акцыі блакавалі будынак кіроўнай партыі.
У Будапешце ў сераду ўвечары сотні людзей сабраліся перад парламентам, каб выказаць пратэст супраць зацверджаных дэпутатамі змяненняў у працоўным кодэксе.
Пра гэта паведамляе Daily News Hungary.
Парламент Вугоршчыны прагаласаваў за падаўжэнне тэрміну, цягам якога працадаўцы могуць улічваць звышурочную працу з мэтай разліку заробку і выхадных дзён, з 12 месяцаў да 3 гадоў, а таксама падняў максімальны ліміт для штогадовай звышурочнай працы з 250 да 400 гадзін.
Пратэстоўцы, многія з якіх скандавалі «ўрад - у адстаўку», прайшлі ад будынка парламента да моста Маргарэт, а затым накіраваліся ў штаб-кватэру кіроўнай партыі «Фідэс».
Двое дэманстрантаў залезлі на балкон, а іншыя паспрабавалі трапіць у будынак. Дэманстрацыя ў «Фідэс» скончылася а 19:00, але ўдзельнікі вярнуліся да парламента. Да 21:00 натоўп запоўніў плошчу перад будынкам, а ў паліцыянтаў пачалі кідаць розныя прадметы.
Паліцыя Будапешта заявіла, што дэманстранты правакавалі праваахоўнікаў, кідаючы ў іх яйкі, банкі з півам і шумавыя гранаты. Паліцыя ўжыла слезацечны газ для разгону дэманстрантаў.