Суд адмовіўся разглядаць пазоў Золатава да Навальнага

Генерал склаў пазоў з парушэннямі.

Люблінскі суд Масквы пакінуў пазоў кіраўніка Расгвардыі Віктара Золатава да Аляксея Навальнага, які тычыцца расследавання пра закупку прадуктаў для супрацоўнікаў ведамства, без руху праз парушэнні. Пра гэта паведамілі журналістам у прэс-службе суда, паведамляе «Дождж».

Пазоў не адпавядае патрабаванням артыкулаў 131 і 132 Грамадзянскага працэсульнага кодэкса. Золатаў павінен ліквідаваць недахопы да 9 студзеня 2019 года.

Кіраўнік Расгвардыі падаў пазоў «аб абароне гонару і годнасці» да Навальнага 11 снежня. Ён патрабуе спагнаць з апазіцыянера мільён рублёў у якасці кампенсацыі.

Адвакат Золатава Шота Горгадзе казаў, што пазоўнік патрабуе прызнаць звесткі аб нерухомасці Расгвардыі і кіраўніцтве, якое, са слоў Навальнага, «аб'ядае сваіх супрацоўнікаў», неадпаведнымі рэчаіснасці. Атрыманыя, у выпадку адпаведнай пастановы суда, ад Навальнага грошы Золатаў паабяцаў накіраваць у дзіцячы дом.

У жніўні Фонд барацьбы з карупцыяй Навальнага выпусціў расследаванне, у якім абвінаваціў Расгвардыю ў закупках прадуктаў завышанымі коштамі ў мясакамбіната «Дружба народаў». Гэта прадпрыемства стала адзіным пастаўшчыком прадуктаў на загад прэм'ер-міністра Дзмітрыя Мядзведзева ў 2017 годзе.

Уладальнікам «Дружбы народаў», гаворыцца ў расследаванні, праз ланцужок кампаній з'яўляецца Барыс Канцяміраў, які раней быў начальнікам Цэнтральнага архіва ўнутраных войскаў МУС. Кіраўніком унутраных войскаў МУС быў Віктар Золатаў, які цяпер узначальвае Расгвардыю.

Пасля гэтага расследавання Золатаў запісаў відэазварот, у якім выклікаў апазіцыянера на дуэль.

Навальны адказаў Золатаву так: ён прапанаваў чыноўніку правесці тэледэбаты на адным з федэральных каналаў і даў яму на разважанні тыдзень. «Дэбаты? Я яго на іншае запрашаў», - адрэагаваў Золатаў. У выніку «дуэлі» так пакуль і не адбылося.

Аднак у лістападзе стала вядома, што Галоўная вайсковая пракуратура пачала праверку кантрактаў паміж Расгвардыяй і пастаўшчыком прадуктаў мясакамбінату «Дружба народаў», а Федэральная антыманапольная служба (ФАС) распачала справу з гэтай нагоды.

Ініцыятарам справы стаў начальнік аддзела ўправы ФСБ Расгвардыі палкоўнік В.А.Вярцей. У ФСБ звярнулі ўвагу на тое, што мясакамбінат мог «незаконна завысіць кошт на прадукцыю, фактычна выступіўшы ў якасці гандлёвага пасярэдніка».