Павешаны ў міліцэйскім аўтамабілі: сталі вядомыя падрабязнасці надзвычайнага здарэння ў Нясвіжы
- 17.12.2018, 15:51
- 91,138
Сям'я загінулага не верыць версіі міліцыі.
У Нясвіжы НЗ - сельскі жыхар быў знойдзены ў міліцэйскай машыне павешаным на шнурках ад чаравік. Першым пра гэта паведаміў блогер Nexta ў сваім тэлеграм-канале.
Nn.by высветліла падрабязнасці гісторыі. Міліцыя сцвярджае, што гэта было самагубства. Сваякі загінулага ўпэўненыя, што суіцыду быць не магло.
Загінулага звалі Сяргей Абрамовіч. Яму было 48 гадоў.
Мужчына жыў у вёсцы Слаўкаве (у некалькіх кіламетрах ад Нясвіжа) разам з бацькам сталага веку. Бацька і выклікаў міліцыю ў той вечар 29 лістапада.
Сяргей Абрамовіч працаваў, са слоў бацькі, «у прыватнікаў, лес пілаваў». З жонкай даўно разышоўся. Часам выпіваў, быў закадаваны.
«У той вечар Сяргей з сябрам ездзіў да свайго начальніка, той разлічыўся з імі гарэлкай. Дзве бутэлькі Сяргей выпіў з тым жа сябрам.
Потым прыйшоў дадому, пасварыўся з бацькам. Бацька ціхенька выклікаў міліцыю», - распавядае Іна, сястра Сяргея. У той вечар яна як раз прыехала да бацькі.
«Прыехала міліцыя, два чалавекі: лейтэнант і прапаршчык. Сяргея забралі», - успамінае Віктар Абрамовіч, бацька загінулага. Гэта было пасля абеду, кажа ён, прыкладна паміж 16.00 і 17.00.
А пазней увечары да бацькі прыехалі следчыя і паведамілі: да аддзялення сына не давезлі. Маўляў, павесіўся проста ў міліцэйскай машыне на шнурках ад чаравік. Цела агледзелі і павезлі адразу ў морг.
Бацька не верыць у суіцыд.
«Як можна павесіцца ў аўтамабілі? Ды я бачыў цела - мы яго забралі. Не было слядоў на шыі, - сцвярджае Віктар Абрамовіч. - Хтосьці са следчых прагаварыўся, што сын зладзіў бойку ў аўтамабілі па дарозе ў пастарунак».
Не верыць у самагубства і сястра Сяргея.
«Прыехала машына, новы УАЗ «Патрыёт». Брата забралі. Але павезлі не ў Нясвіж, а ў бок Юшавічаў. Паехалі праз вёскі. Нібыта там хацелі праверыць нейкага мужыка, які знаходзіўся на ўліку.
А на скрыжаванні каля вёскі Пагулянкі мой брат раптам апынуўся мёртвым», - кажа Іна.
Жанчына ставіць пытанні: ці павінны былі абодва міліцыянты выходзіць з машыны? Як і чаму яе брата пакінулі аднаго? Ці не было ў машыне відэарэгістратара? Калі быў, то чаму ёй нічога не гавораць пра гэта?
«У мяне ёсць дакументы з морга, копія. Там стаіць: «Прычына смерці высвятляецца».
Мой другі брат, малодшы, загінуў даўно. Ён сапраўды павесіўся. Я бачыла, як выглядае чалавек, які павесіўся. Ён быў сіні, і ў пасведчанні аб смерці тады адразу напісалі «асфіксія», - кажа Іна. - А Сяргея мне не дазволілі апранаць. Сказалі, што твар разбіты, трэба накласці грым, усё самі зробяць. Адзявалі яго ў моргу. Ці былі сляды збіцця на целе, я не бачыла. Але на шыі не было слядоў.
Ды і знаёмы міліцыянт мне казаў - павесіцца ў машыне амаль нерэальна».
Са слоў бацькі, нехта з мясцовых бачыў, як стаяў міліцэйскі УАЗ, каля яго знаходзіліся два міліцыянты, а на зямлі ляжала цела. Бацька мяркуе, што сын мог зладзіць бойку, якая скончылася забойствам, можа і выпадковым, - але гэта не быў суіцыд.
Сястра таксама ўпэўненая, што Сяргей памёр не сам, а цяпер міліцыянты «прыкрываюць сваіх»
Цела Сяргея Абрамовіча перадалі сваякам хутка. 29 лістапада ён загінуў, 30 лістапада цела ўжо перадалі сваякам. 1 снежня Сяргея пахавалі.