Сенатары ўнясуць у кангрэс ЗША рэзалюцыю супраць «Паўночнага струменю-2»

Таксама сенатары заклікаюць Трампа і хаўруснікаў ЗША даць рашучы адпор расейскай агрэсіі ў Чорным моры.

Група амерыканскіх сенатараў, якая аб'ядноўвае прадстаўнікоў абедзвюх партый, унясе на разгляд кангрэса рэзалюцыю, якая заклікае скасаваць будаўніцтва газаправода «Паўночны струмень-2» праз пагрозу еўрапейскай энэргетычнай бяспецы, піша The Hill са спасылкай на тэкст дакумента.

Рэзалюцыя, аўтарамі якой выступілі рэспубліканец Рон Джонсан і дэмакрат Дзік Дурбін, таксама заклікае прэзідэнта Дональда Трампа і хаўруснікаў ЗША даць рашучы адпор расейскай агрэсіі ў Чорным моры, каб гарантаваць свабоду суднаходства ў Керчанскай пратоцы, паведамляе РБК.

Сенатары таксама заклікаюць Трампа супрацоўнічаць з кангрэсам і хаўруснікамі ЗША для забеспячэння належнай палітыкі, якая ўтрымае Расейскую Федэрацыю ад далейшай агрэсіі і нагадваюць Трампу пра абавязак уводзіць супраць Расеі санкцыі паводле закона CAATSA («Аб супрацьдзеянні апанентам Амерыкі праз санкцыі»).

Заканадаўцы таксама просяць прэзідэнта санкцыянаваць «актыўную шматнацыянальную аперацыю па свабодзе навігацыі ў Чорным моры» і падтрымаць украінскае войска. Свае подпісы пад дакументам пагадзіліся паставіць 40 сенатараў.

На мінулым тыдні аналагічную рэзалюцыю, якая заклікае краіны Еўропы адмовіцца ад будаўніцтва газаправода, прыняла ніжняя палата кангрэсу ЗША. Кангрэсмены таксама заклікалі Трампа ўвесці санкцыі супраць гэтага праекта ў рамках CAATSA.

Такую рэзалюцыю таксама прынялі ў Еўрапейскім парламенце. «Паколькі Украіна адыгрывае вызначальную ролю ў еўрапейскіх сетках энэргазабеспячэння, дэпутаты Еўрапарламента асуджаюць будаўніцтва трубаправода «Паўночны струмень-2» у абыход Украіны, бо гэта палітычны праект, які ўяўляе пагрозу еўрапейскай энэргетычнай бяспецы», - гаворыцца ў дакуменце.

Праект «Паўночны струмень-2» прадугледжвае будаўніцтва дзвюх нітак газаправода агульнай магутнасцю 55 млрд куб. м газу на год ад узбярэжжа Расеі праз Балтыйскае мора да ўзбярэжжа Нямеччыны.

Супраць рэалізацыі праекта выступае Украіна, а таксама некалькі еўрапейскіх краін, у тым ліку Латвія, Літва і Польшча.