У Беларусі з'явілася першая IT-рота
29- 26.12.2018, 17:18
- 24,529
У новае падраздзяленне ўзброеных сіл набралі 40 чалавек.
У Беларусі з'явілася першая рота інфармацыйных тэхналогій.
У новае падраздзяленне ўзброеных сіл набралі 40 чалавек, іх служба будзе непасрэдна звязаная з праграмаваннем, піша tut.by.
Маладзёны, якім паводле закона трэба было пайсці ў войска, маглі добраахвотна прапанаваць сваю кандыдатуру для службы ў ІТ-роце. Як паведаміла Міністэрства абароны, конкурс у новае падраздзяленне склаў восем чалавек на месца.
Сярод іх выбралі прызыўнікоў з вышэйшай тэхнічнай адукацыяй па ІТ-спецыяльнасці, якія праявілі найбольшую зацікаўленасць у службе ў роце інфармацыйных тэхналогій. У выніку да службы ў новым падраздзяленні прыступілі 40 чалавек.
Навабранцы ўжо прайшлі курс пачатковай вайсковай падрыхтоўкі, выканалі практыкаванні стрэльбаў і прынялі вайсковую прысягу. Цяпер у іх прадаўжаецца агульнавайсковая падрыхтоўка, пасля яны прыступяць да выканання задач па прызначэнні.
«Задачы вайскоўцаў новага падраздзялення будуць звязаныя непасрэдна з праграмаваннем», - падкрэсліваюць у Міністэрстве абароны.
ІТ-рота сфармаваная на базе Вайсковай акадэміі Беларусі. Сярод праектаў, якімі займаецца ўстанова, ключавое значэнне маюць звязаныя з мадэляваннем ваенных дзеянняў, навігацыйным забеспячэннем, распрацоўкай аўтаматызаваных сістэм кіравання і радыёлакацыі.