Кітай абвясціў Расеі інвестыцыйны байкот

Прамыя замежныя інвестыцыі з КНР скарачаюцца чацвёрты квартал запар.

Паварот расейскай эканамічнай палітыкі на Усход, анансаваны пасля анэксіі Крыма і пачатак санкцыйнай вайну з Захадам, зайшоў у тупік, піша finanz.ru.

Нягледзячы на шматлікія заклікі расейскага кіраўніцтва, кітайскія кампаніі адмаўляюцца інвеставаць у рэальны сектар эканомікі Расеі і ўслед за заходнім бізнэсам выводзяць грошы.

За студзень-чэрвень агульны аб'ём прамых замежных інвестыцый з Кітая ў РФ скараціўся на 24%, паведамілі ў ЦБ у сераду.

Паводле вынікаў паўгоддзя кітайскія інвестары забралі 1,005 млрд даляраў, а агульны аб'ём іх укладанняў знізіўся да 3,184 млрд даляраў.

Амаль увесь адток быў звязаны з непасрэдным скарачэннем прысутнасці ў Расеі: 92% сумы (921 млн даляраў) бізнэс вывеў напрамую з капіталу расейскіх кампаній.

Агулам Кітай актыўна нарошчвае інвестыцыі за мяжу: паводле звестак Мінкамерцыі, за студзень-ліпень кітайскія кампаніі ўклалі 65 млрд даляраў у 4 тысячы замежных прадпрыемстваў у 152 краінах і рэгіёнах свету, што на 14% больш за паказчык за мінулы год.

Але Расеі з гэтых сродкаў не дасталася нічога. Паводле звестак ЦБ, адток кітайскіх інвестыцый працягваецца чацвёрты квартал запар, а іх бягучы аб'ём на траціну меншы, чым быў да далучэння Крыма (4,542 даляраў).

У агульнай структуры замежных інвестыцый у РФ на Кітай прыпадае менш за 1%. А агульная сума ўкладанняў у 49 разоў меншая, чым у Кіпра (148 млрд даляраў) і 6 разоў меншая, чым у Нямеччыны (18 млрд даляраў).

Буйныя расейска-кітайскія інвестыцыйныя праекты, якія анансаваліся з помпай, пакуль заканчваліся нічым. Ідэя прадаць кітайскай CEFC долю ў «Раснафце» сарвалася пасля арышту кіраўніка кампаніі Е Яньміня, абвінавачанага ў эканамічных злачынствах.

Праект высакахуткаснай чыгункі «Еўразія» - з Пекіна праз Маскву ў Бэрлін - быў прызнаны нерэнтабельным.

Спроба Мінфіна Расеі выйсці на кітайскі рынак і пачаць пазычаць у юанях таксама застаецца падвешанай у паветры больш за чатыры гады. Выпуск юаневых АФЗ, які першапачаткова планавалі на 2016-ы год, затым перанеслі на 2017-ы, дагэтуль не атрымаў канчатковага ўзгаднення ўладамі Кітая, заявіў у кастрычніку намеснік кіраўніка Мінфіна РФ Сяргей Сторчак.

Апошняя спроба прыцягнуць кітайскія грошы адбылася ў чэрвені, калі прэзідэнт Уладзімір Пуцін наведаў саміт Шанхайскай арганізацыі супрацоўніцтва ў Цыньдаа. Паводле яго вынікаў было прынята падрыхтаваць тэхніка-эканамічнае абгрунтаванне гандлёвай дамовы з КНР, якая павінна стаць аналагам Трансціхаакіянскага партнёрства. Рыхтаваць ТЭА плануецца 2,5 года, тэрміны рэальных інвестыцый не ясныя.

Тэхніка-эканамічнае абгрунтаванне - гэта толькі мемарандум, указвае дырэктар Цэнтра даследаванняў міжнароднай гандлю РАНГіДС Аляксандр Кнобель: такіх дакументаў, што ні да чаго не абавязваюць, чыноўнікі штогод падпісваюць на ВЭФ на некалькі трыльёнаў рублёў.

Кітай гатовы інвеставаць у расейскую эканоміку толькі на пэўных умовах і праз санкцыі зможа цяпер навязваць іх Маскве, кажа старшы навуковы супрацоўнік Інстытута Гайдара Юрый Зайцаў.