У Пінску канфлікт бацькоў з дырэктарам школы давёў да суда

Дырэктара школы абвінавачваюць паводле артыкула «Наўмыснае нанясенне цялесных пашкоджанняў».

У судзе Пінска пачаўся разгляд справы бацькоў школьнікаў супраць дырэктара школы №18 горада над Піннай. Дырэктара школы абвінавачваюць паводле артыкула «Наўмыснае нанясенне цялесных пашкоджанняў», паведамляе «Белсат».

Канфлікт адбыўся ў верасні. Вучні суседняй школы №10 Пінску Міша і Дзяніс на скейтах і самакаце каталіся на тэрыторыі школы №18. Хлопцы не першы раз прыходзілі на ганак чужой школы, каб пакатацца. Раней - да наезду на школьніка - дырэктар гэта дазваляў, у далейшым забараніў. На просьбы адміністрацыі сысці хлопцы рэагавалі смехам і прыводзілі аргумент, што школа - грамадскае месца і іх асабістая прастора. У выніку работнікі школы паклікалі дырэктара Фёдара Радзівона.

Версіі пра тое, што было далей, разыходзяцца. Родныя дзяцей перакананыя: дырэктар выйшаў, схапіў іх сыноў і моцна ўдарыў адзін аб аднаго. У сваю чаргу адміністрацыя школы і блізкія дырэктара называюць сутыкненне выпадковым.

Бацькі школьнікаў накіравалі справу ў суд.

«Следчы камітэт правёў праверку, але складу крымінальнага злачынства не знайшоў. Праваахоўнікі ўважаюць, што тут толькі адміністрацыйная справа - наўмыснае нанясенне лёгкіх цялесных пашкоджанняў. Справу ў суд перадала міліцыя», - кажа Кацярына Ціханчук, мама Мішы.

Наступнае судовае пасяджэнне прызначанае на 14 снежня.