Міхаіл Захараў: Мне шкада ўвесь беларускі хакей
12- 6.12.2018, 14:06
- 11,374
Галоўны трэнер «Юнацтва» распавёў аб сітуацыі ў гэтым тыпе спорту.
Галоўны трэнер мінскага «Юнацтва» Міхаіл Захараў пасля пераможнага матчу з «Гомелем» падзяліўся меркаваннем пра складаную сітуацыю ў беларускім хакеі, паведамляе карэспандэнт «БХ» Сцяпан Варанкоў.
- Цяпер цяжкая сітуацыя не толькі ў гомельскім хакеі, а наогул у беларускім. У чэмпіянаце вельмі цяжкая сітуацыя! Вось у швэдскім чэмпіянаце каманда «Мальмё», з якой мы гулялі ў Лізе чэмпіёнаў, ішла на другім месцы. Цяпер яна на шостым. Ад другога месца яны адстаюць на два балы!
Мне шкада ўвесь беларускі хакей. У мінулым годзе было шэсць каманд добрых, думалі, зробім чэмпіянат [экстралігу «А»], будзе цікавей. У пачатку сезона было пяць вартых каманд. Ніхто б не сказаў, якое месца зойме «Гомель» або «Дынама-Маладзечна». Я думаў, што мы можам без медалёў застацца!
Ну, а цяпер Хмылю і Файкову трэба помнікі паставіць, што «Гомель» і «Дынама-Маладзечна» змагаюцца.
У нас цяпер засталіся тры каманды. На наступны год, можа, і дзве застануцца, - сказаў Міхаіл Захараў.
Адзначым, што «Гомель» і «Дынама-Маладзечна» адчуваюць фінансавыя праблемы. З гэтай прычыны з «Гомеля» нядаўна сышлі некалькі вядучых хакеістаў, сярод якіх і найлепшы бамбардзір Аляксандр Жыдкіх, які перабраўся ў «Юнацтва».
У студзені «Гомелю» трэба будзе прадстаўляць краіну ў суперфінале Кантынентальнага кубка ў Белфасце.
- Як ўпісаўся ў склад Аляксандр Жыдкіх?
- Саша - гэта майстар. Ён цягам доўгага часу паказвае стабільную добрую гульню. Для нас гэта ўзмацненне. Мы яго не забралі, мы яго купілі, - адзначыў Міхаіл Захараў.
Гэта пацвердзіў і настаўнік гомельцаў Алег Хмыль.
- Я б хацеў дадаць. Міхаіл Міхайлавіч, наадварот, нам дапамог тым, што купіў хакеіста. На тыя грошы, якія мы зарабілі, «Гомель» зможа паляцець на Кантынентальны кубак. Наколькі я ведаю, - цытуе «БХ» Алега Хмыля.
Нагадаем, што ў лістападзе на паўфінальны турнір Кантынентальнага кубка ў Францыю «Гомель» дабіраўся на аўтобусе.