У Бэльгіі спрэчка аб міграцыі прычынілася да стварэння ўрада меншасці

Найбуйнейшая з чатырох партый у складзе кіроўнай кааліцыі пакінула яе.

Прэм'ер-міністр Бэльгіі Шарль Мішэль правёў перастаноўкі ў кабінеце міністраў, пасля таго як "Новы фламандскі альянс" (НФА), найбуйнейшая з чатырох партый у складзе ўрадавай кааліцыі, пакінула яе праз супярэчнасці ў праблеме міграцыі. Пастанова НФА прычынілася да ўзнікнення ў краіне ўрада меншасці, якому цяпер давядзецца абапірацца на галасы апазіцыі ў парламенце, перадае DW.

Урадавы крызіс у Бэльгіі стаў вынікам адрознення ў пазіцыях кіраўніка ўрада і кіраўніцтва НФА ў пытанні міграцыйнага пакту ААН, які мае быць ухвалены сусветнымі лідарамі на наступным тыдні ў Марока.

Яшчэ ў верасні Шарль Мішэль паабяцаў, што Бэльгія далучыцца да краін, якія прызнаюць пакт. Прадстаўнік інтарэсаў нацыянальнай меншасці НФА прыстрашыў раскіданнем кааліцыі, калі прэм'ер паляціць у Маракеш на саміт, дзе дакумент плануецца зацвердзіць.

Бэльгійскі кароль Філіп 9 снежня ўхваліў адстаўку кіраўнікоў МУС Яна Ямбона, Міністэрства фінансаў - Ёгана ван Овэртвэлта і міністра абароны Сандэра Лунэса. Шарль Мішэль прадставіў манарху новыя кандыдатуры для заняцця гэтых пасад.

Парламенцкія выбары ў Бэльгіі чакаюцца ў траўні 2019 года.

Сусветны пакт аб міграцыі

Ініцыяваны ААН першы "Сусветны пакт за бяспечную, упарадкаваную і рэгуляваную міграцыю" мае быць афіцыйна прыняты на канферэнцыі ў Марока 10 і 11 снежня 2018 года.

Ён змяшчае шэраг дырэктыў і блізу 20 канкрэтных захадаў, якія не маюць, аднак, юрыдычна абавязковага дзеяння. У ліку гэтых захадаў - выдача уцекачам дакументаў у выпадку іх адсутнасці, спыненне дыскрымінацыі і доступ да праграм сацыяльнай дапамогі.

На сённяшні дзень акрамя Аўстраліі ўжо адмовіліся падпісваць дакумент Аўстрыя, Балгарыя, Вугоршчына. Ізраіль, Польшча, ЗША і Чэхія.