Eurostar адкрывае наўпроставы маршрут Лондан-Амстэрдам
4- 10.02.2018, 15:59
- 11,416
З красавіка цягнікі гэтым маршрутам будуць хадзіць двойчы на дзень.
Кампанія Eurostar, чые цягнікі ходзяць па тунэлі пад Ла-Маншам, адкрывае наўпроставае чыгуначнае злучэнне маршрутам Лондан-Амстэрдам, паведамляе расейская служба BBC.
З 4 красавіка цягнікі гэтым маршрутам будуць хадзіць двойчы на дзень. Паездка ад вакзала Сэнт-Панкраса ў Лондане да Амстэрдама зойме 3 гадзіны 41 хвіліну.
Але на першым часе цягнікі Eurostar будуць хадзіць толькі з Лондана да Амстэрдама.
Пасажыры, якія адпраўляюцца ў зваротным кірунку ў брытанскую сталіцу, павінны будуць перасаджвацца ў Брусэлі, каб прайсці пашпартны кантроль.
Кампанія Eurostar запэўнівае, што прыпынак у Брусэлі – часовы захад, які будзе дзейнічаць датуль, пакуль галандскія і брытанскія ўлады не дамовяцца аб арганізацыі памежнага пашпартнага кантролю на вакзале Амстэрдама. Як абяцаюць, гэта будзе зроблена да канца 2019 года.
Аналіз Вікторыі Фрыц, карэспандэнта ВВС у пытаннях транспарту:
- Гэтага чакалі ўжо даўно, і вось, нарэшце, пасажыры змогуць падарожнічаць наўпроставым чыгуначным маршрутам паміж Брытаніяй і Нідэрландамі.
Аператар нямецкіх чыгунак - кампанія Deutsche Bahn - яшчэ пяць гадоў таму спачатку абвясціў, а потым скасаваў наўпроставы маршрут паміж брытанскай і галандскай сталіцамі.
З тых часоў спробы Eurostar адкрыць такі маршрут натыкаліся на бюракратычныя перашкоды і тэхнічныя праблемы.
Колькасць пасажыраў, хутчэй за ўсё, будзе невялікай, прынамсі, спачатку. Брытанцы прывыклі падарожнічаць у Еўропу цягніком, але для галандцаў Eurostar не такі вядомы брэнд.
З Брытаніі кожны дзень будуць адпраўляцца толькі два цягнікі - гэта можна параўнаць з 70 наўпроставымі авіярэйсамі з Лондана ў Амстэрдам.
Eurostar не можа спаборнічаць з авіялініямі ў гнуткасці маршрутаў, але гэтая чыгуначная кампанія канкуруе з авіяперавозчыкамі ў кошце квіткоў. Кошт квітка Eurostar у адзін канец пачынаецца з 35 фунтаў.
Знойдзецца нямала пасажыраў, асабліва сярод бізнэсоўцаў, якія аддадуць перавагу доступу да электрычнай разеткі, свабоднага Wi-Fi і зручнаму працоўнаму месцу ў цягніку бляску сучасных аэрапортаў.
Ключавым пытаннем будзе спрашчэнне пашпартнага кантролю на шляху з Амстэрдама ў Лондан. Наўпроставае злучэнне без лішніх клопатаў - гэта раскоша, за якую многія будуць гатовыя плаціць.