Міністарка працы распавяла, калі зноў падвысяць пенсійны ўзрост

Ірына Касцевіч уважае за неабходнае абмеркаванне гэтага пытання.

«Як ты будзеш жыць у старасці, трэба думаць ужо ў маладосці», - заявіла міністарка працы Ірына Касцевіч у расповедзе пра суму дапамог на дзяцей, паведамляе «Минская правда».

Міністарка таксама закранула пытанне падвышэння пенсіённага ўзросту і праблему страхавога стажу.

Ірына Касцевіч нагадала таксама аб тым, што з 1 студзеня гэтага года пачаўся чарговы этап падвышэння пенсіённага ўзросту: цяпер жанчыны выходзяць на пенсію ў 56 гадоў, мужчыны - у 61 год. За кошт паэтапнага павелічэння да 2022 года жанчыны змогуць скарыстацца сваім правам на заслужаны адпачынак у 58 гадоў, мужчыны - у 63. На пытанне, ці павялічацца гэтыя лічбы ў перспектыве, міністарка адказала:

- Пакуль мы не абмяркоўваем пытанне далейшага падвышэння пенсіённага ўзросту. Трэба прааналізаваць, як гэтая рэформа паўплывае на пенсійнае забеспячэнне, - адзначыла Ірына Касцевіч. - Скажам, у 2017 годзе колькасць грамадзян, якія атрымліваюць пенсію, у параўнанні з 2016 годам скарацілася на 25 тысяч. Гэта значыць, гэтыя людзі засталіся на рынку працы без атрымання пенсіі з прычыны павелічэння пенсійнага ўзросту. Які ўплыў гэтая рэформа будзе рабіць у далейшым - пакажа час. Але, думаю, да 2019-2020 года мы зноў падыдзем да абмеркавання гэтага пытання.

Міністарка адзначыла, што пра тое, «як ты будзеш жыць у старасці, трэба думаць ужо ў маладосці».

- Часта на прыёмах грамадзян сутыкаешся з тымі, хто не напрацаваў страхавога і працоўнага стажу, атрымлівае маленькую сацыяльную пенсію і пытаецца: «Як на гэтыя грошы можна пражыць?». Афіцыйная занятасць стварае падушку бяспекі для грамадзян у старасці, - сказала Ірына Касцевіч.

Міністарка таксама закранула пытанне беспрацоўя. На аднаго беспрацоўнага цяпер прыпадае 2,6 вакансіі, удакладніла Ірына Касцевіч. Паводле яе слоў, існуе «праблема з захаваннем балансу паміж попытам і прапановай».

- Сёння наймальнік мае патрэбу ў кваліфікаваных кадрах. А ў службу занятасці пераважна звяртаюцца грамадзяне з нізкім узроўнем адукацыі: яны хочуць працаваць вартаўнікамі, ахоўнікамі, прыбіральшчыкі, - патлумачыла міністарка.