У Падмаскоўі загінулі два беларускія будаўнікі

12 лютага іх целы знайшлі ў падмаскоўнай кватэры, дзе яны праводзілі рамонт.

Расейскія следчыя высвятляюць акалічнасці смерці двух беларускіх працаўнікоў. 12 лютага іх целы знайшлі ў падмаскоўнай кватэры, дзе яны праводзілі рамонт. Падрабязнасці паведамляе прэс-служба Следчага камітэта Расеі, піша tut.by.

Уладальнік дома ў Шчолкаўскім раёне ў Падмаскоўі наняў двух беларусаў, каб тыя выканалі аздобныя працы ў доме. У адзін з візітаў дзверы ніхто не адчыніў.

Унутры знайшлі целы мужчын. Побач на стале - амаль пустая пяцілітровая бутэлька з-пад незамярзальнай вадкасці для аўто. Такую вадкасць знайшлі і ў рондалі на пліце.

«Падчас агляду дома следчымі ўстаноўлена, што агульны парадак не парушаны, сляды барацьбы, бойкі, валачэння ў доме адсутнічаюць, усе каштоўнасці і рэчы знаходзяцца ў захаванасці», - паведамляе ўправа СК Расеі Маскоўскай вобласці.

Папярэдняй прычынай смерці названае атручэнне невядомым рэчывам. Узоры вадкасці вывучаць экспэрты, таксама прызначаная судова-медыцынская экспэртыза.

Гэта ўжо другі за люты трагічны выпадак з беларускімі будаўнікамі ў Расеі. Раней у адным з жылых комплексаў Масквы былі забітыя двое мужчын. Там беларусы працавалі яшчэ з трыма расейцамі, якіх адшукваюць.