Навукоўцы давялі, што шчасце можна набыць за пэўную суму грошай

Сума залежыць ад краіны пражывання.

Псіхолагі з амерыканскага ўніверсітэта Пэрдзью ў Індзіяне правялі даследаванне сярод 1,7 мільёна чалавек з 164 краін і прыйшлі да высновы, што шчасце можна набыць. Але сума залежыць ад краіны пражывання. Напрыклад, у ЗША чалавеку трэба зарабляць ад $60 000 да $75 000 на год, каб дасягнуць эмацыйнага дабрабыту, і $95 000 для задаволенасці жыццём.

Даследчыкі прыкмецілі, што калі пэўны парог даходу дасягнуты, то далейшае яго павелічэнне, як правіла, прыводзіць да зніжэння задаволенасці жыццём і памяншэння эмацыйнага дабрабыту.

Навукоўцы звязваюць гэта з тым, што грошы здольныя задаволіць базавыя патрэбы, пакупніцкія запыты, але да пэўнага моманту. А пасля праходжання аптымальнага пункту людзі імкнуцца набываць больш матэрыяльных каштоўнасцяў, увязваюцца ў сацыяльную гонку, параўноўваючы сябе з іншымі, што зніжае іх эмацыйны фон шчасця.

Поўны артыкул апублікаваны ў часопісе Nature Human Behavior і даступны для пакупкі за $20, якія вызначана зробяць больш шчаслівымі выдаўцоў часопіса.