23 траўня 2018, Серада, 17:50
Рубрыкі

Менскія таксісты рыхтуюць страйк

27

Кіроўцы менскіх таксовак «135» незадаволеныя новымі тарыфамі кампаніі.

На 15 лютага запланаваны страйк таксістаў, якія працуюць на службу «135». Кіроўцы незадаволеныя новымі тарыфамі кампаніі.

Пра прычыны страйку nn.by распавёў адзін з кіроўцаў:

«Амаль увесь мінулы год мы вазілі пасажыраў па 60 капеек за кіламетр. Потым кошты збіраліся падымаць, прычым, была дамоўленасць паміж службамі 135, 152 і «Алмаз 7788» (найбуйнейшы дыспетчар таксовак, яго кантралюе бізнэсовец Віктар Пузікаў. - заўв.). У выніку падвысіла кошты толькі наша кіраўніцтва. Стала 70 капеек за кіламетр, - кажа суразмоўца. - Але дырэктар службы моцна пакрыўдзіўся на канкурэнтаў і наважыўся дэмпінгаваць. Ён панізіў кошты, цяпер у нас пасадка каштуе 4,5 рубля, а кіламетр - 55 капеек. Гэта тыя ж тарыфы, што і ў «Алмаза», але нашы аўто лепшыя і лепшае абслугоўванне. Пры аднолькавых коштах кліенты пойдуць да нас».

Галоўная прэтэнзія кіроўцаў да Радкевіча ў тым, што тарыфы знізілі, а з таксістаў за заказы бяруць столькі ж.

«Калі кошты падвышалі, з нас таксама сталі браць больш - па 1,3 рубля за заказ. А цяпер тарыфы знізілі, а з нас бяруць усё адно па 1,3, - абураецца кіроўца. - Калі дырэктар нам рэжа тарыфы, хай і сабе нешта зрэжа. Я працую па 14-16 гадзін штодня. Зусім без выходных, абсалютна. За месяц такой працы зарабляю 400-500 даляраў».

Са слоў суразмоўцы, у страйку плануюць узяць удзел як мінімум 400 таксістаў. Усяго ж у службе таксовак «135» працуе блізу 1300 чалавек.

Дадамо, што «Uber» бярэ з пасажыраў 37 капеек за кіламетр.