Metallica атрымае «Нобелеўскую прэмію ў музыцы»
7- 14.02.2018, 21:32
- 14,216
Metallica стала першым метал-калектывам, які ганараваўся Polar Music Prize.
Гурт Metallica стаў лаўрэатам прэстыжнай міжнароднай прэміі Polar Music Prize, якую яшчэ называюць «Нобелеўскай прэміяй у музыцы», паведамляе ВВС.
Арганізатары прэміі заявілі, што гурту атрымалася «ператварыць падлеткавы пакой у Вальхаллу».
Цырымонія ўзнагароджання прэміяй адбудзецца ў Стакгольме ў чэрвені, прызавы фонд складае 90 тысяч фунтаў (125 тысяч даляраў).
Metallica стала першым метал-калектывам, які ганараваўся Polar Music Prize. Дагэтуль яе лаўрэатамі былі Пол Макартні, Чак Бэры, Бі Бі Кінг.
Прэмія была створаная ў 1989 годзе мэнэджарам гурта ABBA Стыгам Андэрсанам.
Metallica - адзін з найбольш вядомых і камерцыйна паспяховых метал-гуртоў свету. Разам з Megadeth, Anthrax і Slayer Metallica уваходзіць у так званую «вялікую чацвёрку трэш-металу», якой удалося папулярызаваць жанр.