CPJ: Беларускія ўлады павінны спыніць абмяжоўваць свабоду слова напярэдадні II Еўрапейскіх гульняў

Камітэт абароны журналістаў заклікае неадкладна вярнуць доступ да сайта Charter97.org.

Камітэт абароны журналістаў (Committee to Protect Journalists (CPJ)) - міжнародная няўрадавая арганізацыя са штаб-кватэрай у Нью-Ёрку, якая займаецца абаронай правоў журналістаў, заклікала Міністэрства інфармацыі Беларусі разблакаваць доступ да найбуйнейшага незалежнага навінавага вэб-сайту Charter97.org.

Наталля Радзіна, галоўная рэдактарка сайта, паведаміла CPJ, што доступ да сайта заблакаваны ў Беларусі з 24 студзеня, а апошнія дні некаторыя інтэрнэт-ананімайзеры, якія беларусы выкарыстоўвалі для абыходу цэнзуры, таксама былі заблакаванымі.

«Мы заклікаем улады Беларусі неадкладна вярнуць «Хартыю-97» яе аўдыторыі ў Беларусі і спыніць абмяжоўваць доступ да незалежнай інфармацыі ў краіне», - сказала каардынатарка праграмы CPJ Europe і Central Asia Ніна Агнянава. «Акрамя таго, Беларусь павінна скасаваць сваю рэпрэсіўную палітыку ў дачыненні да СМІ, бо яна рыхтуецца да правядзення Еўрапейскіх гульняў у 2019 годзе».

Наталля Радзіна, якая атрымала Міжнародную ўзнагароду за свабоду друку CPJ, рэдагуе сайт у выгнанні пасля таго, як у 2011 годзе была вымушаная пакінуць Беларусь праз ціск, напады і турэмнае зняволенне ў адказ на крытычны аналіз «Хартыяй-97» аўтарытарнага рэжыму Аляксандра Лукашэнкі, гаворыцца ў заяве Камітэта абароны журналістаў.

Як паведаміла Радзіна CPJ, папулярнасць незалежнага вэб-сайта няўхільна расце апошнія шэсць гадоў. «Гэтае блакаванне - спроба зачысціць інфармацыйную прастору Беларусі ад свабодных галасоў», - сказала яна.