«Зыбіцкую ўжо пабудавалі - знішчылі бераг»: менчукі патрабуюць спыніць будоўлю ў цэнтры горада

Жыхары сталіцы выступілі супраць будаўніцтва забаўляльнага цэнтра на вуліцы Старажоўскай.

На пачатку гэтага года менчукам стала вядома пра запланаванае будаўніцтве буйнога забаўляльнага цэнтра на вуліцы Старажоўскай. Будынак агульнай плошчай 17,6 тысяч кв м хочуць пабудаваць на месцы нямецкага бункера часоў Вялікай Айчыннай вайны паміж набярэжнай Свіслачы і будынкам «Банка Масква-Мінск». Учора ў адміністрацыі Цэнтральнага раёна прайшла прэзентацыя праекта, на якой мясцовыя жыхары і гарадскія актывісты выказалі сваё меркаванне аб планаванай забудове, паведамляе onliner.by.

Некалькі дзён таму на сайце адміністрацыі Цэнтральнага раёна з'явілася аб'ява аб правядзенні сходу, дзе будзе абмяркоўвацца справаздача аб уздзеянні аб'екта на навакольнае асяроддзе. Учора а 18:00 у актавай зале адміністрацыі сабраліся неабыякавыя грамадзяне, праўда, іх было зусім няшмат. Яны былі перакананыя, што справа зусім не ў адсутнасці цікавасці, а ў недастатковай дасведчанасці.

- Як мы будзем нешта абмяркоўваць, калі тут пяць чалавек сабралася, - выказваў незадаволенасць хтосьці з мясцовых жыхароў.

- Аб'ява толькі пазаўчора з'явілася - вядома, не ўсе ведалі, - падтрымлівалі адзін аднаго суседзі. Прадстаўнікі адміністрацыі толькі заклікалі да ўзаемапавагі і прапанавалі пачаць. Спікеры пазначылі тэзісы, а пасля прапанавалі перайсці да пытанняў, якіх было нямала. Пераважна гараджане ў прынцыпе выказваліся супраць будаўніцтва комплексу.

- Зыбіцкую ўжо пабудавалі - знішчылі бераг. Калі ўжо будаваць моладзевы цэнтр, ён павінен быць лірычным, а гэта манументальны будынак! - выклікае падтрымку суседзяў паджылая жанчына.

Архітэктар Алег Вараб'ёў, які распрацаваў праект, у адказ на заўвагу прапанаваў звярнуць увагу на тое, што забудова берагоў рэк у вялікіх гарадах - агульнасусветная практыка.

Менчукі адзін за адным казалі пра тое, што жыхары раёна не зацікаўленыя ў пабудове комплексу і аб'ект проста нікому не патрэбны.

- Пабудуйце гэты цэнтр у Каменнай Горцы, у Зялёным Лузе - там, дзе ён сапраўды патрэбны. Нам ён патрэбны? - пытаўся нехта з прысутных. - А бункер няхай стаіць, ён можа выкарыстоўвацца ў якасці бамбасховішча ў выпадку небяспекі.

Акрамя мэтазгоднасці пабудовы забаўляльнага комплексу, мясцовых жыхароў і неабыякавых гараджан хвалявала пытанне экалогіі і бяспекі будаўніцтва на беразе ракі. Жыхар аднаго з дамоў Цэнтральнага раёна, спрабуючы аргументаваць непатрэбнасцю даволі грувасткага будынку, успомніў, як праходзіла грамадскае абмеркаванне дома «Ля Траецкага».

- Калі ў нас будаваў Чыж, лічбы былі яшчэ больш пераканаўчыя. І што ж мы маем цяпер? Міма гэтага дома праз смурод нават прайсці нельга, наш дом дыхае выхлапнымі газамі, а цяпер яны ўзмоцняцца, будзе павялічаная транспартная плынь, будзе запаганеная Свіслач! Таму, прабачце, вашыя лічбы нічога не значаць. Запаскудзілі раён, - абураўся мужчына.

- Вашая прапанова? Пакінуць усё як ёсць? - прыспешваў яго намеснік кіраўніка адміністрацыі Вадзім Пярэдня.

- Так. Не падабаецца? Будуйце на месцы «Банка Масква-Мінск».

Большасць людзей імкнулася нават не дапускаць магчымасці паспяховага будаўніцтва. Адзіны хлопец, які надумаў, што комплексу ўсё ж быць, прапанаваў зрабіць кампенсацыйныя пасадкі не на тэрыторыі ўсяго раёна, а менавіта на набярэжнай, і пастарацца захаваць як мага больш старых дрэў і камунікацый. Старшыня камісіі папрасіў унесці прапанову ў пратакол і нагадаў, што на сёння плануецца высечка 27 дрэў наўзамен якіх будзе пасаджана 150.

Як высветлілася падчас сустрэчы, пакуль праект дэталёвага планавання яшчэ не прайшоў зацвярджэнне: цяпер дакумент распрацаваны і знаходзіцца ў камітэце архітэктуры і горадабудаўніцтва Менгарвыканкама.

Са слоў архітэктара Алега Вараб'ёва, менчукоў яшчэ чакае грамадскае абмеркаванне плана (сённяшняя сустрэча прысвечана менавіта экалагічным складнікам). У сваім выступе ён адзначыў, што будынак не будзе небяспечны для навакольнага асяроддзя: праект мае на ўвазе ўстаноўку ачышчальных збудаванняў, а таксама мадэрнізацыю інжынерыі вонкавых сетак і павелічэнне прапускных дыяметраў.