Царкоўныя шпілі ў Вялікай Брытаніі будуць раздаваць інтэрнэт
- 20.02.2018, 15:10
- 8,782
Англіканская царква і ўрад падпісалі пагадненне.
Дамова дазваляе мабільным і інтэрнэт-правайдэрам Вялікай Брытаніі выкарыстоўваць царкоўныя шпілі для раздачы інтэрнэту і сотавай сувязі.
Большасць англіканскіх цэркваў знаходзіцца ў сельскай мясцовасці. Яны размяшчаюцца ў цэнтры населенага пункта, таму лёгка змогуць забяспечыць сувязь і доступ да інтэрнэту. Гэтым новаўвядзеннем улады Вялікай Брытаніі плануюць палепшыць мабільнае злучэнне па-за гарадамі і ў краіне агулам да 2022 года, паведамляе ВВС.
Камерцыйныя пагадненні, заявіў урад, дыяцэзіі і парафіі будуць укладаць з мабільнымі аператарамі і інтэрнэт-правайдэрамі на месцах.
«Нават будынак XV стагоддзя зможа дапамагчы Брытаніі падрыхтавацца да будучыні, палепшыць жыццё людзей, забяспечваючы сувязь у нашых самых цяжкадаступных раёнах», - кажа кіраўнік міністэрства лічбавых тэхналогій, культуры, медыяў і спорту Мэт Хэнкок.
У Вялікай Брытаніі ўжо больш за 120 цэркваў дапамагаюць раздаваць інтэрнэт і сеціва. Для гэтага шпілі будынкаў забяспечаныя бесправаднымі перадатчыкамі, антэнамі, спадарожнікавымі талеркамі і іншай тэхнікай.
Цяпер інтэрнэтам LTE можна карыстацца на 43% тэрыторыі Вялікай Брытаніі, а мабільная сувязь даступная толькі на 70% тэрыторыі краіны.