Лявон Баршчэўскі: БНР стваралі менавіта беларусы, а не «савецкія людзі»
- 20.02.2018, 16:20
- 8,344
Беларускія грамадзяне апярэдзілі «заблукалую ў часе» ўладу.
Грамадскі дзеяч, былы старшыня Партыі БНФ Лявон Баршчэўскі распавёў «Радыё Рацыя», чаму ўлады не імкнуцца да нацыянальнага, а трымаюцца за савецкае.
- Міністр адукацыі Ігар Карпенка ўжо заявіў, што краіна будзе рыхтавацца да святкавання 100-годдзя камсамола, а вось аб святкаванні 100-годдзя Беларускай Народнай Рэспублікі дзяржаўныя чыноўнікі практычна і не ўспамінаюць. Чаму так адбываецца?
- Нашчадкі рэпрэсіўнага рэжыму сёння пры ўладзе, а камсамол быў структурай гэтага рэжыму. І яны трымаюцца за гэтыя сімвалы менавіта для таго, каб паказаць, што ў краіне нічога не змянілася, ёй кіруюць тыя ж людзі. І маладому пакаленню даюць «пасыл» на будучыню, што і далей гэтыя «камсамольцы» будуць кіраваць. Каб народ не вельмі задумваўся, што гэта можна і трэба памяняць. Той жа камсамол застаецца сімвалам чапляння за ўладу. Хочуць паказаць, што, маўляў, яна непахісная і вечная. Імкнуцца ствараць менавіта такую ілюзію.
- Але ж 100-я ўгодкі БНР - гэта для ўсёй краіны значная дата...
- Гэтая дата як раз не ўпісваецца ў іх парадыгму. БНР стваралі менавіта беларусы, а камсамол і БССР - «савецкія людзі». Гэта ж пастанова прымалася не ўнутры краіны, а ў Маскве. Сённяшняя ўлада пакуль яшчэ не здольная прызнаць, што беларусы могуць мець пераемнасць ад сваіх традыцый і чапляецца за сталінска-ленінскія.