Cуд над украінскім журналістам Шаройкам: прысуд ужо вынесены?

Закрыты судовы працэс, хутчэй за ўсё, ужо закончаны.

Нагадаем, карэспандэнта «Украінскага радыё» ў Менску арыштавала КДБ Беларусі 25 кастрычніка мінулага года. 12 лютага стала вядома аб пачатку суда над ім, які праходзіў за зачыненымі дзвярыма.

Інфармацыя пра тое, што працэс павінен быў закончыцца ў панядзелак, 19 лютага, апублікаваў са спасылкай на свае крыніцы, народны дэпутат Украіны Дзмітрый Тымчук, які ўзначальвае групу «Інфармацыйнае супраціў».

Карэспандэнты «Радыё Свабода» звязваліся з прэс-сакратаркай Вярхоўнага суда Беларусі Юліяй Лясковай, з адвакаткай Шаройкі Ларысай Быкавай. Аднак яны адмовіліся паведаміць, ці быў агучаны прысуд Паўлу Шаройку і якім ён можа быць. Украінскага консула на працэс і на абвяшчэнне прысуду не запрасілі наогул.

Такога закрытага працэсу, мабыць, яшчэ не было ў гісторыі беларускага правасуддзя. Абвінавачаных у шпіянажы на Беларусі раней судзілі таксама ў закрытых працэсах, але пра дату пачатку суду і вынясення прысуду паведамлялася, і ва ўсіх закрытых працэсах адкрытым было вынясенне прысуду. Тут жа поўная інфармацыйная блакада.

Судовы працэс у інфармацыйнай блакадзе

Адвакат і следчыя нічога не каментуюць аб ходзе суда не толькі журналістам, але і ў амбасадзе Украіны ў Беларусі. На мінулым тыдні ўкраінскі пасол Ігар Кізім заявіў: «Я больш закрытага працэсу ў жыцці не бачыў».

Паводле ягоных слоў, апошні раз ўкраінскі консул бачыў Паўла Шаройку ў снежні мінулага года, затым консул змяніўся і новы ужо не меў магчымасці наведаць Шаройку ў следчым ізалятары КДБ Беларусі.

Няма інфармацыі, ці былі сведкі на працэсе Паўла Шаройкі, у чым яго канкрэтна абвінавацілі, наогул ці чыніў ён нейкую шкоду беларускай дзяржаве. Невядома таксама, хто быў суддзём, а хто пракурорам.

Пасол Украіны Ігар Кізім адзначыў, што ў яго напрошваецца паралель з судом над беларусам Юрыем Палітыкам, якога, з аналагічным абвінавачваннем у шпіянажы цяпер судзяць у Чарнігаве, але там працэс адкрыты.

Цяпер ёсць неафіцыйная інфармацыя з надзейных крыніц, што прысуд Паўлу Шаройку ужо агучаны, аднак, як яго пакаралі, не гавораць - прысуд застаецца ў таямніцы. Фармальна Шаройку маглі пакараць пазбаўленнем волі ад 7 да 15 гадоў.

Паралельныя шпіёнскія суды

Назіральнікі ў Менску выказваюць надзею, што Паўла Шаройку могуць абмяняць на беларуса Юрыя Палітыку, але працэс над ім у Чарнігаўскай раённым судзе зацягваецца, наступнае пасяджэнне там абвешчана на 27 лютага. Магчыма, гэтая таямніца ў беларускім Вярхоўным судзе звязаная з тым, што чакаюць прысуду ў Чарнігаве.

Працэсуальна Павел Шаройка не можа нават абскардзіць свой прысуд, бо працэс праходзіў у Вярхоўным судзе.

Як развіваўся шпіёнскі скандал

Украінскі журналіст Павел Шаройка быў затрыманы супрацоўнікамі КДБ Беларусі 25 кастрычніка 2017 у Менску і абвінавачаны ў стварэнні ў Беларусі шпіёнскай сеткі з ліку грамадзян краіны, «якія за грашовае ўзнагароджанне выконвалі ягоныя заданні для збору інфармацыі выведвальнага характару ў вайскова-палітычнай сферы».

Афіцыйныя СМІ Беларусі пісалі, што Шаройка нібыта працаваў пад кіраўніцтвам украінскага дыпламата, выправаджанага з Беларусі, і іх задачай нібыта было вывучаць дзейнасць урада Беларусі, МЗС, расейскай амбасады і расейскіх вайсковых аб'ектаў, «заводзіць і развіваць знаёмства, пачынаць ці працягваць атрыманне інфармацыі ад іх».

КДБ Беларусі сцвярджала, што Шаройка нібыта прызнаў сваю віну. Міністэрства абароны Украіны і «Украінскае радыё» заяўлялі, што паведамленні беларускага КДБ «не адпавядаюць рэчаіснасці».