Расея з 26 лютага забараняе ўвоз з Беларусі малочнай прадукцыі

Забарона ўводзіцца ў сувязі з выпадкамі паступлення небяспечнай малочнай прадукцыі з Беларусі ў РФ.

Расея з 26 лютага забараняе ўвоз з Беларусі малака, вяршкоў, сыроваткі і іншай малочнай прадукцыі. Пра гэта tut.by паведаміла прэс-служба Рассельгаснагляду.

«Рассельгаснагляд з 26 лютага 2018 года вымушаны ўвесці часовыя абмежаванні на пастаўкі ў Расею прадукцыі, у якой выяўлялася найбольшая колькасць парушэнняў», - гаворыцца ў паведамленні структуры.

У спісе забароненых да ўвозу прадуктаў - малако і вяршкі пастэрызаваныя стэрылізаваныя і ультрапастэрызаваныя налівам; малако і вяршкі сухія, канцэнтраваныя, кансерваваныя і згушчаныя; сыроваткі малочныя наліўныя канцэнтраваныя, сухія; канцэнтрат сыроватачны і малочны бялок.

Адзначаецца, што забарона ўводзіцца ў сувязі з выпадкамі паступлення небяспечнай малочнай прадукцыі з Беларусі ў Расею.

Пастанова аб забароне паставак была прынятая на нарадзе ў Рассельгаснаглядзе з удзелам намесніка ўстановы Мікалая Уласава. У структуры падкрэслілі, што часовыя абмежаванні ўводзяцца «да правядзення адпаведных перамоў з ветэрынарнай службай Рэспублікі Беларусь».

Нагадаем, напярэдадні Рассельгаснагляд накіраваў ліст у дэпартамент ветэрынарнага і харчовага нагляду Мінсельгасхарча Беларусі, у якім выказаў заклапочанасць сітуацыяй з бяспекай беларускага малака і малочнай прадукцыі. У расейскай структуры адзначылі тэндэнцыю росту паступлення ў Расею малочнай прадукцыі, якая змяшчае рэшткі забароненых і шкодных рэчываў.

Раней Рассельгаснагляд неаднаразова то прыпыняў, то дазваляў увоз мяса-малочнай прадукцыі і мяса птушкі ў Расею з прадпрыемстваў Беларусі. Прэтэнзіі тычыліся парушэнняў ветэрынарна-санітарных патрабаванняў. Летась на беларускіх заводах працавалі інспектары Рассельгаснагляду. Паводле неафіцыйнай інфармацыі, такімі метадамі Расея дае адпор так званым санкцыйным пастаўкам. Менск намагае на абсалютна легальным продажы сваёй прадукцыі.