У Беларусі можа здарыцца транспартны калапс
10- 23.02.2018, 15:24
- 35,723
З 26 лютага могуць вырасці кошты маршрутак.
У панядзелак увойдуць у дзеянне папраўкі да закона «Аб аўтамабільным транспарце і аўтамабільных перавозках», які не дазваляе прыватным перавозчыкам працаваць паводле ранейшых правілаў. На новыя правілы прыватныя перавозчыкі не пагаджаюцца, паведамляе «Белсат».
Набыць квіткі на міжгароднюю маршрутку на 26 лютага нельга - іх не прадаюць.
23 лютага на Сhange.org з'явілася петыцыя, у якой прыватныя перавозчыкі патрабуюць унесці папраўкі ў новую рэдакцыю закона «Аб аўтамабільным транспарце і аўтамабільных перавозках».
Цяпер трэба ўзгадняць маршрут з дзяржорганамі
Галоўная прэтэнзія «маршрутчыкаў» - прыбраць пункт аб узгадненні маршрута з дзяржорганамі, як гэта прадугледжвае новая рэдакцыя закона.
«Месяц таму «нерэгуляршчыкі» пачалі атрымліваць лісты ад Транспартнай інспекцыі. У іх паведамлялася, што пасля праведзенага маніторынгу іх аўтобусы ездзяць пэўнымі маршрутамі рэгулярна - у вызначаныя дні і паводле раскладу, але пры гэтым дамоў на такія перавозкі ў кіроўцаў нямала - а гэта парушэнне Закона «Аб аўтамабільным транспарце і аўтамабільных перавозках», - гаворыцца ў петыцыі прыватных перавозчыкаў.
Абноўлены закон патрабуе ад прыватных перавозчыкаў укласці дамовы з «мясцовымі аператарамі на ажыццяўленне транспартных перавозак».
Маршруткі будуць ездзіць з вакзалаў
Згодна з новымі правіламі «маршрутчыкі» абавязаныя адпраўляцца з вакзала, ездзіць вызначаным маршрутам і спыняцца толькі на канкрэтных прыпынках, а таксама распрацаваць расклад, інтэрвалы руху транспартных сродкаў, колькасць рэйсаў па маршруце.
Новыя правілы перавозкі пасажыраў прывядуць да росту коштаў праезду.
«Перавозчыкі павінны будуць плаціць за паслугі аператару аўтамабільных перавозак і аўтавакзала», - тлумачаць аўтары петыцыі.