У Беларусі ў расейскім серыяле не паказалі актора, які выконваў ролю Лукашэнкі
1- 23.02.2018, 18:35
- 19,449
У серыяле «Остров» дыктатар з'яўляўся ў начным клубе.
У расейскім серыяле «Остров», які ў Беларусі трансляваў тэлеканал ТНТ-International (Беларусь), у адной з серый гледачы не ўбачылі дзве сцэны з удзелам актора, які выконваў ролю Аляксандра Лукашэнкі.
Чытач tut.by Станіслаў глядзеў серыял «Остров» у запісе праз лічбавую тэлевізію velcom.
- Я гляджу серыял на ТНТ Int, а мая дачка - ва «Укантакце». Яна здзівілася гэтаму эпізоду і распавяла мне. Я быў здзіўлены наяўнасці цэнзуры на расейскім канале. Як гэта магчыма? Хоць цяпер зразумела, чаму серыі выходзяць на адну пазней, - мяркуе Станіслаў.
Паводле сюжэта, персанаж Аляксандра Лукашэнкі з'яўляецца ў двух эпізодах серыі, у снах аднаго з галоўных герояў. Яго твар не паказваюць, але паводле характэрнага вымаўлення пазнаць дзейную асобу не складана. У першы раз пад песню «Касіў Ясь канюшыну» Лукашэнка з'яўляецца ў начным клубе і зачытвае вясельнае віншаванне з паштоўкі.
Другім разам ён з'яўляецца, каб сказаць наказ на дарогу таму ж герою, толькі ўжо чалавеку сямейнаму: «Вяселле, задзёр - усё гэта, вядома, выдатна. Толькі рана ці позна гэта ўсё пройдзе. Бо і дзеўкі ўсе пасталеюць, і дыска-бар твой любімы зачыняць. А вось гэтыя дзверы, Лёха, яны будуць чакаць цябе заўсёды. Бо сям'я - гэта самае галоўнае ў жыцці. Згодны?»
Вось гэтыя эпізоды (2-гі сезон, 10-я серыя). Чытач запэўнівае, што па ТНТ-International (Беларусь) яны паказаны не былі.
Кіраўнік ТАА «Трыо Медыя» (праваўладальнік ТНТ International Беларусь) Сяргей Булацкі паведаміў, што ў праграме вяшчання беларускі офіс нічога не мяняе.
- Мы транслюем тое, што нам выдае Масква. Калі хтосьці глядзіць ТНТ федэральны, то яно адрозніваецца ад ТНТ міжнароднай версіі, - сказаў на заканчэнне ён.