Пенсійная «пастка» закране кожнага
20- 24.02.2018, 8:13
- 36,973
Але і перамога над сістэмай будзе агульнай для ўсіх.
Незалежны прафзвяз РЭП правёў сацыяльнае апытанне аб стаўленні беларусаў да пенсійнай рэформы. 60% рэспандэнтаў заявілі, што яны ахвочыя ў той ці іншай форме выказваць сваю незадаволенасць пенсійнай сістэмай.
Але што больш за ўсё абурае беларусаў? На гэтае пытанне Charter97.org адказвае прадстаўніца РЭП у Берасцейскай вобласці Зінаіда Міхнюк:
- Больш за ўсё людзей абурае тое, што з страхавога стажу прыбралі адпачынак для догляду дзіцяці, службу ў войску і навучанне.
Я асабіста праводзіла апытанні ў «сталіцы Палесся» Пінску. Людзі адказвалі ахвотна: было відаць, што ў іх «накіпела». Адказвалі нават тыя, хто на дзяржаўнай службе, нават супрацоўнікі МНС. Відаць, што праблема закранула ўсіх.
Прыемна бачыць, што ў беларусаў не засталося страху. Рэагуюць жорстка, выказваюцца шчыра, ніхто не хаваецца за спіны іншых. Людзі рознага веку і прафесій адназначна супраць пенсійнай «рэформы». Шмат хто не саромеючыся лаяцца. Казалі пра тое, што ва ўладзе нейкае «раздваенне асобы»: то ім дзяцей нараджаць, як патрабаваў Лукашэнка, то праз гэта пакідаюць без пенсіі.
Падчас аднаго з апытанняў ў Пінску на вуліцы Савецкай я сустрэла здымачную групу БТ. Падышла да іх і сказала: вы, вядома, гэтага не пакажаце, але як можна так падманваць людзей? Вы што, апаілі тых, хто ў вашай перадачы казаў, што ўхваляе падпісанае Лукашэнка павышэнне пенсійнага ўзросту? Такіх людзей проста няма ў Беларусі!
- Якія гісторыі з расказаных людзьмі Вам запомніліся больш за ўсё?
- Ды вось проста на суседняй са мной вуліцы да мяне, як да прадстаўніцы прафзвязу РЭП у вобласці, звярнулася жанчына, якая выгадавала дваіх выдатных сыноў. Калі б адпачынак для догляду дзіцяці ўваходзіў у стаж, то яна б атрымлівала пенсію. А так выйшла, што апошнія пяць гадоў яна прапрацавала кіраўніцай фірмы, якая не даплаціла ў ФСАН. У выніку ёй адказалі: прыходзьце ў 60 гадоў - прызначым вам сацыяльную пенсію. Праз недарэчны закон чалавек трапіў у пенсійную «пастку».
Хачу сказаць, што ў такую ж сітуацыю цяпер трапяць прадпрымальнікі, які шмат гадоў адпрацавалі на заводах, але потым сышлі ў сваю дзейнасць, бо прадпрыемствы сталі стратнымі.
Пенсійная «пастка» ў той ці іншай форме закране ўсіх: каму налічаць менш стажу, камусьці дадуць сацыяльную пенсію, хтосьці будзе гадамі хадзіць па судах.
Але ёсць ва ўсім гэтым і станоўчы момант: праблема закранула ўсіх і кансалідавала людзей. У грамадстве адбыліся важныя перамены. Значна больш стала людзей, якія шчыра абураюцца і ахвочыя пратэставаць.
Калі раней, калі ў 2010 годзе я была даверанай асобай кандыдата ў прэзідэнты Андрэя Саннікава, людзі былі актыўныя, але ўсё-ткі яшчэ асцерагаліся рэпрэсій, то цяпер народ распрасталі плечы. Бо пенсійная рэформа «зачапіла рыкашэтам» усіх.
Праблемы з пенсійным фондам «вандруюць» з адной галіны ў іншую. Калі хто-небудзь думае, што яго не закране, ён вельмі памыляецца. Калісьці, напрыклад, будаўнікам няблага ручыла. Гэта нават уважалася за галіну, якая квітнее. А цяпер - глядзіце: у нас такі магнат, як Будтрэст №8, змізарнеў. Ніколі б у жыцці ніхто не падумаў, што з ім можа такое здарыцца. Цяпер у людзей, хто там працаваў, могуць быць праблемы з пенсіямі.
- І што рабіць у гэтай сітуацыі?
- Ведаеце, я маю знаёмку, якая мае праблемы з пенсіяй, і яна яе «выбівае». Я ёй кажу: трэба кудысьці зноў працаваць ўладкоўвацца. А яна мне адказвае: «Дзіўная ты, Зінаіда. Неўзабаве ўсё гэта абрынецца. Усе гэтыя законы скасуюць - і нармальныя будуць ва ўсіх пенсіі». Вось якія ў нас цяпер людзі!
Мы «прапусцілі» той момант, калі падвышалі пенсійны ўзрост, але праблемы з'ядналі людзей. Як калісьці і дэкрэт аб «дармаедах», і іншыя законы гэтай уладзе. Прыемна бачыць, як людзі абуджаюцца, як далёкія раней ад «палітыкі» збіраюцца 25 Сакавіка святкавалі Дзень Волі. Бяда нас згуртавала - але і перамога над сістэмай будзе агульнай для ўсіх.