ЗША перанясуць пасольства ў Ерусалім раней, чым планавалася
- 24.02.2018, 15:12
- 5,557
Урачыстае адкрыццё запланаванае на 70-ю гадавіну з дня ўтварэння дзяржавы Ізраіль.
ЗША заявілі пра намер перанесці сваю амбасаду ў Ізраілі з Тэль-Авіва ў Іерусалім раней, чым планавалася. Адкрыццё запланаванае на 14 траўня, у 70-ю гадавіну з дня ўтварэння дзяржавы Ізраіль. Пра гэта паведаміла ў пятніцу, 23 лютага, прэс-служба Дзяржаўнага дэпартамента (пераклад - liga.net).
«Мы вельмі радыя распачаць гэты гістарычны крок і з нецярпеннем чакаем адкрыцця ў траўні», - гаворыцца ў паведамленні Дзярждэпу.
Адзначаецца, што амбасадар Дэвід Фрыдман і частка персаналу першапачаткова размесцяцца на тэрыторыі амерыканскага генконсульства ў раёне Арнона, на поўдні Ерусаліма. Да канца 2019 года плануецца адкрыццё іншага будынка.
22 студзеня паведамлялася, што ЗША плануюць да канца 2019 года перамясціць сваю амбасаду ў Ізраілі з Тэль-Авіва ў Ерусалім.
6 снежня прэзідэнт ЗША Дональд Трамп афіцыйна прызнаў Ерусалім сталіцай Ізраіля. Пастанова амерыканскага лідара выклікала хвалю пратэстаў у Палесцінскай аўтаноміі і шэрагу мусульманскіх краін, а таксама справакавала сутыкненні паміж палесцінцамі і ізраільскімі сілавікамі.
21 снежня Генасамблея ААН большасцю галасоў прыняла рэзалюцыю, якая заклікае краіны не прызнаваць Ерусалім сталіцай Ізраіля, насуперак пагрозам з боку прэзідэнта ЗША адплатай у выглядзе скарачэння дапамогі не згодным з ягонай пастановай краінам.