Раскамнагляд разблакаваў сайт Аляксея Навальнага

Расейскія аператары паступова здымаюць абмежаванні на наведванне сайта.

Раскамнагляд выключыў з рэестра забароненай інфармацыі старонкі сайта апазіцыянера Аляксея Навальнага. Расейскія аператары паступова здымаюць абмежаванні на наведванне сайта, паведамляе bbc.com.

"У сувязі з выкананнем адміністрацыяй інтэрнэт-рэсурсу патрабаванняў суда гэтыя старонкі 26 лютага з Адзінага рэестра выключаныя", - паведамілі Інтэрфаксу ў прэс-службе Раскамнагляду.

"Тая самая спасылка, праз якую заблакаваны мой блог, яе ўжо ніхто не наведвае, усе, у асноўным, глядзяць расследаванне ў YouTube. Таму мы цяпер яе закрыем, перанясем усю гэтую інфармацыю на вонкавую спасылку, гэта значыць, яна нікуды не знікне і людзі будуць яе знаходзіць", - растлумачыў Навальны на сваім канале.