У Менску знайшлі таксіста з двума лічыльнікамі

Нелегальны прыбытак парушальніка склаў звыш $25 тысяч.

У сталіцы выявілі таксіста, які выкарыстаў для працы два прыборы, якія вызначаюць кошт праезду. Адзін з іх быў незарэгістраваным, паведамілі агенцтву «Мінск-Навіны» ва ўправе аператыўных мерапрыемстваў інспекцыі МПЗ Рэспублікі Беларусь горада Менску.

Ва ўстанове адзначылі, што цяпер усе аўтамабілі-таксоўкі, якія надаюць паслугі ў перавозцы пасажыраў, падлягаюць абавязковаму аснашчэнню сродкам кантролю падатковых органаў (СКПО). Гэта электронныя прылады, якія ажыццяўляюць збор, апрацоўку і перадачу інфармацыі аб грашовым абарачэнні суб'екта гаспадарання. Яны спалучаныя з таксометрамі. Бываюць выпадкі, калі сігнал, які паступае з прылады, знікае на розныя прычыны. Некаторыя нядобрасумленныя кіроўцы карыстаюцца гэтым і свядома адключаюць СКПО, тлумачачы адсутнасць сігналу тэхнічнымі няспраўнасцямі абсталявання.

- Ва ўправу аператыўных мерапрыемстваў ІМПЗ горада Менску паступіла інфармацыя ад пасажыра, які скарыстаўся паслугамі аднаго з перавозчыкаў сталічнай таксоўкі. Ён паведамляў, што чэк, сфармаваны таксометрам і перададзены яму ў пацверджанне аплаты за перавозку, выклікаў сумнеў у сапраўднасці, хоць і адказваў шматлікім атрыбутам гэтага чэка. Правёўшы комплекс мерапрыемстваў, супрацоўнікі ўправы ўстанавілі, што чэк з'яўляецца несапраўдным, бо таксометр, з дапамогай якога ён сфармаваны, у інфармацыйных рэсурсах інспекцыі не значыцца, - распавялі ў падатковай інспекцыі.

Супрацоўнікі ўправы знайшлі кіроўцу, які выдаў пасажыру сумнеўны чэк. Пасля кантрольнай закупкі было выяўленае парушэнне парадку прыёму грашовых сродкаў. Таксама падчас агляду машыны ў бардачку аўто ўдзельнікі праверкі выявілі незарэгістраваны ў падатковых органах таксометр.

Пры далейшым разглядзе спецыялісты высветлілі, што перавозчык набыў другі таксометр у 2015 годзе. Кіроўца дзейнічаў паводле наступнай схемы: здымаў зарэгістраваны прыбор уліку кошту праезду і ўсталёўваў нелегальны. Другі таксометр служыў для адводу вачэй, каб пасажыр не западозрыў кіроўцу ў парушэнні дзейнага заканадаўства. Даход жа не паступаў у касу.

Нелегальны прыбытак парушальніка склаў звыш 2000 базавых адзінак (больш за $25 тысяч).

- Цяпер на аўтатранспартны сродак нядобрасумленнага перавозчыка накладзены арышт. Высвятляюцца ўсе акалічнасці гэтага правапарушэння, пасля чаго матэрыялы праверкі будуць накіраваныя ў праваахоўныя органы для дачы прававой ацэнкі, - пракаментавалі ў ІМПЗ.