Аўтадылеры змогуць рэгістраваць новыя аўто без агляду ў ДАІ

Адпаведныя змены прадугледжаныя распрацаваным законапраектам.

Магчымасць аказання прадаўцом паслугі ажыццяўлення дзяржаўнай рэгістрацыі транспартнага сродку перад перадачай яго пакупніку плануецца падаць аўтадылерам у Беларусі. Пра гэта сёння на сустрэчы з прадстаўнікамі аўтабізнэсу паведамілі супрацоўнікі ўпраўлення ДАІ МУС, паведамляе БелТА.

Прадстаўнікі ДАІ расказалі, што адпаведныя змены прадугледжаныя распрацаваным законапраектам. Цяпер гэтая працэдура складаная - дылеру трэба атрымаць натарыяльную даверанасць ад пакупніка, пасля чаго падаць аўтамабіль на агляд ДАІ.

«У праект пастановы, якая вызначае парадак рэгістрацыі транспарту, ужо ўнесенае палажэнне, дзе для прадаўцоў-юрыдычных асоб скасоўваецца абавязак напраўляць на агляд аўтамабіль, які не эксплуатаваўся і год выпуску якога супадае з гэтым або папярэднім годам. Таксама магчымасць перадачы паўнамоцтваў аўтадылерам на ажыццяўленне рэгістрацыі транспартнага сродку за яго пакупніком мяркуецца афармляць шляхам унясення адпаведных палажэнняў у дамову куплі-продажу. Гэта значыць новае аўто ў гэтым выпадку мы прапануем рэгістраваць без агляду ДАІ. Гэта спросціць у разы ўсю працэдуру», - адзначыў старшы інспектар асаблівых даручэнняў УДАІ МУС Алег Ліванскі.