Сёння - гадавіна забойства Барыса Нямцова

Дзяржаўны дэпартамент ЗША заклікаў пакараць усіх датычных да забойства палітыка.

Барыс Нямцоў быў застрэлены на Вялікім Маскварэцкім мосце 27 лютага 2015 года. Прысуд паводле справы аб ягоным забойстве вынеслі ў ліпені мінулага года. Выканаўцы забойства Заура Дадаева прысудзілі да 20 гадоў турмы, чацвёра суўдзельнікаў атрымалі ад 11 да 19 гадоў. Замоўца злачынствы дагэтуль не выяўлены.

Вашынгтон у гадавіну смерці Барыса Нямцова заклікаў расейскія ўлады пераканацца, што ўсе, хто датычны да забойства апазіцыйнага палітыка, арганізатары і замоўцы, былі прыцягнутыя да адказнасці. Аб гэтым паведамляецца на сайце Дзярждэпартамента ЗША.

У заяве адзначаецца, што Нямцоў быў «вядучай фігурай дэмакратычнага руху», які «прысвяціў сваё жыццё служэнню грамадству і паставіў сабе мэту зрабіць Расею больш квітнеючай і свабоднай». Памяць пра Нямцова натхняе расейцаў і іншыя народы ва ўсім свеце ўдзельнічаць «у цяжкай, часам небяспечнай барацьбе за справядлівасць, дэмакратыю і адказны ўрад», гаворыцца ў заяве амерыканскага замежнапалітычнага міністэрства.

ЗША заклікаюць расейскі ўрад выконваць свае абавязанні ў абароне ўсеагульных правоў чалавека, у тым ліку свабоду выказвання меркавання, свабоду на мірныя сходы і свабоду на стварэнне асацыяцый.

У Вашынгтоне сёння адбудзецца афіцыйная цырымонія адкрыцця плошчы Нямцова. Гарадская рада ў пачатку студзеня аднагалосна прагаласавала за паскораны парадак прыняцця законапраекта аб прысваенні імя Нямцова плошчы перад расейскім пасольствам.

Маскоўскія ўлады, якія доўга змагаліся з ушанаваннем памяці Барыса Нямцова, на мінулым тыдні дазволілі ўсталяваць памятную шыльду на доме, дзе жыў палітык.

25 лютага ў Расеі прайшлі акцыі памяці Барыса Нямцова. У іх узялі ўдзел тысячы чалавек.