На Нобелеўскую прэмію міру вылучана 329 кандыдатаў

Рэкорд па колькасці намінантаў быў усталяваны ў 2016 годзе, калі кандыдатаў было 376.

Трыста дваццаць дзевяць кандыдатаў прэтэндуюць на Нобелеўскую прэмію міру за 2018 год, якая будзе прысуджаная ў Нарвегіі гэтай восенню. Як гаворыцца ў распаўсюджаным у аўторак паведамленні Нарвежскага нобелеўскага інстытута, на прэмію вылучана 217 чалавек і 112 арганізацый, паведамляе ТАСС.

Рэкорд па колькасці намінантаў быў усталяваны ў 2016 годзе, калі іх было 376. Гэта таксама быў адзіны раз, калі прэтэндэнтаў на прэстыжную ўзнагароду было больш, чым сёлета.

Традыцыя, якая склалася не прадугледжвае абвяшчэння спісаў з імёнамі тых, хто быў намінаваны на Нобелеўскую прэмію. Толькі па заканчэнні 50-гадовага тэрміну пасля прысуджэння ўзнагарод Нобелеўскі фонд уважае магчымым апублікаваць дакументы, якія ляглі ў аснову прынятых пастаноў.

Згодна з апошняй воляй Альфрэда Нобеля (1833-1896), прэмія міру, у адрозненне ад чатырох астатніх узнагарод, заснаваных у адпаведнасці з яго завяшчаннем, прысвойваецца не ў Стакгольме, а ў Осла. Навуковец указваў, што пастанову аб прысуджэнні прэміі павінен прымаць камітэт з пяці чалавек, прызначаных парламентам Нарвегіі, і гэтая традыцыя па-ранейшаму выконваецца.

У адпаведнасці з завяшчаннем шведскага навукоўца, прэмія міру павінна прысуджацца «асобе, што дабілася найбольшых поспехаў, альбо якая зрабіла больш за іншых у справе згуртавання народаў і скарачэння колькасці дзейных войскаў, а таксама за правядзенне мірных кангрэсаў і прыцягненне да іх увагі». Зрэшты, у апошнія гады фармулёўка больш чым векавой даўнасці тлумачыцца Нарвежскім нобелеўскім камітэтам досыць шырока.

У 2017 годзе лаўрэатам узнагароды стала Міжнародная кампанія забароны ядзернай зброі (International Campaign to Abolish Nuclear Weapons, ICAN). Уладальніка прэміі міру 2018 года назавуць у кастрычніку, а ўручэнне ўзнагароды будзе праходзіць у Осла 10 снежня - у гадавіну смерці Нобеля.