Пуцін засакрэціў персанальныя звесткі чыноўнікаў

У дакуменце замацаваны абавязкі ФСА ў абароне персанальных звестак чыноўнікаў, а таксама іх сямейнікаў.

Прэзідэнт Расеі Уладзімір Пуцін падпісаў указ, які ўносіць змяненні ў палажэнне аб Федэральнай службе аховы (ФСА). У адпаведнасці з апублікаванай на афіцыйным партале прававой інфармацыі дакумента, ФСА надзяляецца паўнамоцтвамі абароны персанальных звестак «аб'ектаў дзяржаўнай аховы і іх сямейнікаў».

Таксама ў палажэнне аб ФСА маецца падпункт, у якім гаворыцца пра ўдзел службы «ў межах сваёй кампетэнцыі» ў рэалізацыі палітыкі ў галіне інфармацыйнай бяспекі, выяўленні і ліквідацыі кібератак на расейскія рэсурсы, паведамляе РБК.

У дакуменце таксама замацаваны паўнамоцтвы ФСА ў складанні пераліку рэчаў, якія забаронена праносіць на аб'екты, што ахоўваюцца.

Указ уваходзіць у дзеянне з моманту апублікавання.

Згодна з ФЗ «Пра дзяржаўную ахову», такая ахова надаецца прэзідэнту, старшыні ўрада, спікерам Дзярждумы і Савета Федэрацыі, старшыням Канстытуцыйнага і Вярхоўнага судоў, генпракурору і старшыні Следчага камітэта.

«Прыняцце ўказа надае легітымнасць засакрэчванню звестках пра сваякоў дзяржслужбоўцаў катэгорыі «А», - пракаментаваў экс-супрацоўнік пракуратуры, адвакат Вадзім Багатурыя. На думку Багатурыя, з аднаго боку, абарона звестак сваякоў чыноўнікаў можа абараніць іх ад супрацьпраўнага ціску, з другога - такі закон трэба ўводзіць толькі пры наяўнасці рэальнага грамадскага кантролю за іх даходамі.

Паўнамоцтвы ФСА былі пашыраныя ў ліпені мінулага года, калі прэзідэнт падпісаў адпаведны закон. У дакуменце адзначалася, што яго палажэнне не распаўсюджваецца на тыя персанальныя звесткі, якія службовыя асобы павінны раскрываць у адпаведнасці з расейскім заканадаўствам.

Старшыня думскага камітэта бяспекі і супрацьдзеяння карупцыі Васіль Піскароў сказаў РБК у чэрвені мінулага года, што закон не закране дэкларацыі чыноўнікаў пра даходы, але яго палажэнні распаўсюджваюцца на інфармацыю пра месца знаходжання асобы, якая ахоўваецца, і яе сямейнікаў.