Заіка: У нас мільянеры атрымліваюць льготы на ацяпленне

Рэальным вызначэннем колькасці беднякоў у краіне павінны займацца прафзвязы.

Леанід Заіка ў экспрэс-каментары «Салiдарнасцi» ацаніў звесткі афіцыйнай статыстыкі, згодна з якой больш за 160 тысяч беларускіх сем'яў, або 4,2% насельніцтва, маюць даходы ніжэйшыя за ўзровень пражытковага мінімуму, які складае 197 рублёў на месяц.

- Для вызначэння бюджэту пражытковага мінімуму мы можам выкарыстоўваць, напрыклад, расейскую метадалогію, - заўважае эканаміст. - Расейцы палічылі, які ў іх мінімальны пражытковы мінімум, а мае калегі-эканамісты даведаліся пра выдаткі на насельнікаў маскоўскага заапарка.

І высветлілася, што адзін сярэднестатыстычны расеец жыве лепш, чым вожык, але горш, чым асёл. Застаецца толькі спадзявацца, што сярэдні беларус жыве лепш, чым насельнікі заапарка.

Са слоў суразмоўцы, колькасць сем'яў, якія жывуць за мяжой беднасці, «трэба павялічыць адсоткаў да 15-20%, калі рэальна глядзець на стан рэчаў».

- У нас з 2014 года даходы знізіліся ўдвая. Так, цяпер яны крыху падраслі. А ў студзені заробкі зноўку зменшыліся, - тлумачыць ён.

На думку Леаніда Заікі, рэальным вызначэннем колькасці беднякоў у краіне павінны займацца прафзвязы - і ўлічваць не толькі агульны ўзровень коштаў, але і выдаткі на жыллё, рэальныя выдаткі людзей на навучанне і медыцынскае абслугоўванне.

- У Беларусі розныя сацыяльныя дапамогі атрымліваюць звыш 50% насельніцтва. Гэта значыць, абсалютна бязглуздая сацыяльная палітыка. Пры гэтым, датацыі на жыллё могуць атрымліваць мільянеры, міністры, якія жывуць у Драздах. Яны ж таксама атрымліваюць льготы на ацяпленне!

Рэцэпт тут просты: падтрымку ад дзяржавы павінна атрымліваць максімум 15% насельніцтва. Гэта інваліды, дзеці, пенсіянеры. А ў нас такое адчуванне, што ўрад развучыўся лічыць. Вазьміце тыя ж пенсіі - заўсёды суадносіны пенсіі да заробку былі дзесьці 40-50%. А ў нас пенсія цяпер блізу 150 даляраў, хоць павінна быць 200-250. І ніхто не навёў парадак, - звяртае ўвагу эканаміст.