Мікалай Статкевіч: Улада не хоча, каб людзі збіраліся на вуліцах

Палітычная апазіцыя павінна біць ва ўсе званы.

«Чатыры арганізацыі з 13 пайшлі на няўзгодненыя з аргкамітэтам дзеянні. Раней мы абмяркоўвалі нашы планы, прынялі агульную пастанову. Таму мы здзіўленыя такім учынкам. Мяркую, што гэта ненармальна.

Да таго ж, мы з цяжкасцю прыйшлі да адзінства - і гэта як раз нармальна. Некаторыя абурыліся з нагоды стрыму - добра, што стрым не было 100 гадоў таму, бо многія інакш бы ставіліся да бацькоў-заснавальнікаў БНР, - расказаў «Нашай Ніве» адзін з лідараў Беларускага Нацыянальнага Кангрэсу Мікалай Статкевіч. - Падазрэнні ўзнікаюць, што адмовілі нашай заяўцы пасля нейкіх сустрэч - хтосьці намякнуў, маўляў, адхіліце гэтую, мы новую пададзім.

Мы бачым, як улада баіцца шэсцяў, усякай нагоды, каб людзі сабраліся разам. У сталіцы больш-менш спакойна, у рэгіёнах сацыяльная напружанасць нарастае. Таму ўлада не хоча, каб людзі збіраліся на вуліцах, а канцэрт уважае за больш бяспечную форму.

Я разумею моладзь, якая вырасла пры гэтай уладзе, якая прывыкла, што Лукашэнка існуе з яе нараджэння. Яны прыстасоўваюцца да сістэмы. Калі сярод іх знаходзяцца такія, хто хоча нешта рабіць - малайцы.

Але існуе палітычная апазіцыя, якая павінна ўвесь час біць у званы, нагадваць, што ў краіне ненармальная сітуацыя, больш нідзе ў Еўропе такога няма. Гэта абавязак апазіцыі. І гэта важна менавіта цяпер».

Чаму шэсце неабходнае, Мікалай Статкевіч падрабязна растлумачыў у «Фэйсбуку»:

«Калі ў гадавіну жорсткага падаўлення народнага выступу за свае правы мы будзем толькі слухаць музыку і танчыць у атачэнні прапускных рамак, то мы дыскрэдытуем сябе ў вачах тых людзей, якія пайшлі за намі год таму».

Але калі ўлада дзейнічае супольна з часткай апазіцыі - гэта ўжо дасягненне, адзначыў Мікалай Статкевіч.

«Улада спрабуе ўпіхнуць нам канцэрт у цэнтры горада - гэта дасягненне! Але гэта вынік нашай шматгадовай працы, акцый, шэсцяў, мітынгаў. Таму хай канцэрт будзе нашым падарункам афіцыйнай апазіцыі. А мы (камітэт арганізацыі святкавання) падумаем, што рабіць далей», - заявіў палітык.