Кожны месяц на раздрукоўку квітанцый для менчукоў сыходзіць грузавік паперы

Пасля 15-га чысла кожнага месяца ў паштовых скрынях з’яўляюцца рахункі за жыллёва-камунальныя паслугі.

Нядаўна камунальнікі агучылі: каб надрукаваць квітанцыі для жыхароў сталіцы, у месяц сыходзіць 3,5 тоны паперы, піша kp.by. Гэта цэлы грузавік!

- У Менску вялікі жылы фонд, пражывае блізу 2 млн чалавек, у сярэднім друкуем блізу 700 тысяч паведамленняў, - распавядае начальнік аддзела маркетынгу Цэнтра інфармацыйных тэхналогій Менгарвыканкама Дзмітрый Парфіяновіч. - Наклад велізарны, таму расходуецца шмат паперы.

Камунальнікі заклікаюць менчукоў берагчы прыроду і адмовіцца ад папяровых квітанцый на карысць электронных, якія будуць прыходзіць вам на электронную пошту. Гэта магчыма з 2014 года, але пакуль на віртуальныя квітанцыі перайшлі ўсяго 4382 менчукі.

- Калі адмовіцца ад раздрукаваных квітанцый і перайсці на электронныя, гэта знізіць матэрыяльныя выдаткі, а таксама прывядзе да паляпшэння экалагічнай сітуацыі, - тлумачыць Дзмітрый Парфіяновіч. - Я асабіста даўно карыстаюся электроннымі квітанцыямі. Гэта зручна. Не трэба вылоўліваць паведамленне ў паштовай скрыні ў пад'ездзе, плюс на электронную пошту яно прыходзіць на дзень-два раней. І захоўваць лягчэй, дакладна не згубіцца.

Каб атрымліваць электронныя паведамленні, трэба проста прыйсці з пашпартам у свой разлікова-даведачны цэнтр (РДЦ), напісаць заяву аб адмове ад папяровых квітанцый і ўказаць электронную пошту, на якую будуць прыходзіць рахункі.

«Дзеля квітанцый мэтанакіравана высякаюць дрэвы»

- Па якасці і вонкавым выглядзе паперы мяркую, што квітанцыі робяць з першаснай драўніны, а не з перапрацаванай сыравіны. Гэта значыць дзеля яе мэтанакіравана высякаюць дрэвы, - кажа спецыяліст Цэнтра экалагічных развязанняў Марыя Сума. - Акрамя таго, папярова-цэлюлозная прамысловасць сама па сабе вельмі таксічная. Будзе выдатна, калі як мага больш людзей адмовіцца ад папяровых квітанцый і пяройдзе на электронныя!

Уважаецца, што на тону паперы сыходзіць прыкладна 17 дарослых дрэў. Гэта значыць, калі б усе менчукі перайшлі на электронныя квітанцыі, у месяц высякалі б як мінімум на 60 дрэў менш.