Забастоўка маршрутчыкаў: У Беларусі актывізаваліся сэрвісы пошуку спадарожнікаў

Наведванне сэрвісу BlaBlaCar з тэрыторыі Беларусі павялічылася на 20%.

Беларусы шукаюць альтэрнатыву маршруткам. «Спадарожнікі» прапаноўваюць заплаціць за паездку ўдвая больш за «маршрутчыкаў».

Нагадаем, 26 лютага ўвайшла ў дзеянне змена ў Закон «Аб аўтамабільным транспарце і аўтамабільных перавозках».

Новаўвядзенні закранулі нерэгулярных міжгародніх перавозак на маршрутных таксі. Ад маршрутчыкі патрабуюць заключаць дамовы з дзяржаўнымі аператарамі, прывязацца да вакзалаў, распрацоўваць расклад і маршрут і ўдзельнічаць у конкурсе на права ажыццяўлення пасажыраперавозак.

Не ўсе згодныя з такімі патрабаваннямі, таму ў некаторых гарадах Беларусі маршруткі перасталі рабіць рэйсы.

Бо рэгулярныя аўтаперавозчыкі і БЧ не могуць замяніць прапановы прыватных кіроўцаў, пасажыры сталі шукаць варыянты выхаду з сітуацыі, якая склалася. У сацыяльных сетках актывізаваліся групы пошуку спадарожнікаў, больш зваротаў стала паступаць і на адпаведныя інтэрнэт-сэрвісы.

Выказваліся здагадкі, што і маршрутчыкі, якія засталіся без працы змогуць скарыстацца гэтымі сэрвісамі, знойдуцца і аўтааматары ахвочыя падзарабіць.

Адзін з самых папулярных у свеце сэрвісаў па пошуку спадарожнікаў BlaBlaCar Аляксей Лазарэнка, кіраўнік сэрвісу ў Расеі і Украіне, пракаментаваў «Медыя-Палессі» сітуацыю, якая склалася:

- Адразу хачу адзначыць, што BlaBlaCar афіцыйна не працуе на тэрыторыі Беларусі, але інтэрнэт, як той казаў, агульны, таму беларусы могуць карыстацца расейскай або ўкраінскай версіямі сайта для пошуку спадарожнікаў, і, адпаведна, бачыць кошт за паездку ў рублях або грыўнях. Ці еўра, калі карыстаюцца еўрапейскай версіяй сайта.

Пасля 26-га лютага колькасць наведванняў нашага сайта з тэрыторыі Беларусі вырасла на 20%.

Звяртаю ўвагу, што сэрвіс BlaBlaCar не прызначаны для здзяйснення камерцыйных пасажырскіх перавозак. Нашым сэрвісам могуць карыстацца толькі простыя аўтаўладальнікі, з аўтамабілямі катэгорыі Б, якія робяць свае паездкі па асабістых мэтах, а пасажыраў бяруць, таму што ім з імі па шляху. Мы кантралюем кошт паездкі, таму кіроўцы могуць толькі часткова кампенсаваць выдаткі на паліва, але не атрымліваць прыбытак. Такі спосаб паездак называецца райдшэрынг.

Калі ж кіроўца імкнецца атрымаць прыбытак з дапамогай нашага сэрвісу (завышае ўказаны кошт, выкарыстоўвае забароненыя аўтамабілі, напрыклад, аўтобусы і г.д.), то такіх кіроўцаў мы ў абавязковым парадку блакуем. Па-першае, таму што яны парушаюць нашы правілы. Па-другое, таму што, хутчэй за ўсё, яны парушаюць законы сваёй краіны. Прынамсі, у Расеі і Украіне для вядзення камерцыйнай дзейнасці кіроўца павінен мець адпаведную ліцэнзію таксі і плаціць падатак з атрыманага прыбытку.

Сёння BlaBlaCar афіцыйна прадстаўлены ў 22 краінах свету, мае больш за 60 млн. карыстальнікаў, у тым ліку больш за 12 мільёнаў у Расеі і больш за 1 мільён ва Украіне. Невялікая частка гэтых карыстальнікаў з'яўляецца беларусамі але, колькі канкрэтна - не вядома.

Наш суразмоўца растлумачыў, што іх сэрвісам могуць карыстацца толькі простыя аўтаўладальнікі, з аўтамабілямі катэгорыі Б. У гэтую катэгорыю транспартных сродкаў трапляюць аўтамабілі, дазволеная максімальная маса якіх не перавышае 3500 кілаграмаў і колькасць месцаў для сядзення, у якіх, акрамя сядзення кіроўцы, не перавышае васьмі.

Пад гэтыя характарыстыкі трапляе, напрыклад, мікрааўтобус FIAT Ducato Combi SWB. І гэты аўтамабіль прапануецца на сэрвісе для пошуку спадарожнікаў з Пінска ў Менск на 1 сакавіка. Таксама на гэты маршрут шукае спадарожнікаў кіроўца Volkswagen Caravelle і яшчэ адзін бус.

Кошт паездкі выстаўлена ад 16 да 27 рублёў, у маршрутчыка такая паездка на сённяшні дзень каштуе ад 10 да 12 рублёў.