Да 100-годдзя БНР з'явяцца манеты з «Пагоняй»

Намінал манеты - адзін талер.

Сувенірныя манеты да юбілею першай беларускай дзяржавы выйдуць у серыі «Мая краіна Беларусь». Іх аўтар і стваральнік - майстар-аматар Валерый Сіманаў з Дзяржынска. Сюрпрызам дызайну новага сувеніра стала «Пагоня» з крыламі, як у версіі 1918 года. Намінал манеты - 1 талер, наклад - 100 асобнікаў, тэрмін выпуску - люты 2018. Нацыянальны банк Беларусі на юбілейную дату БНР ніяк не адрэагаваў, піша hrodna.life.

Уласнай валюты першая беларуская дзяржава стварыць не паспела. На яе тэрыторыі адначасова выкарыстоўваліся царскія рублі, «керанкі», «златуўкі» і нямецкія грошы. Выпуск манеты з сімволікай БНР будзе, на думку Валерыя Сіманава, пэўнай кампенсацыяй гэтай «гістарычнай несправядлівасці».

На аверсе манеты ў цэнтры знаходзіцца стылізаваны герб «Пагоня» з крыламі. За прататып малюнка, са згоды аўтараў, былі ўзятыя малюнкі з календара «Адрасы БНР. 1918 - 2018».

Рэверс манеты мае выявы сучасных і гістарычных сімвалаў краіны, надпіс «Жыве Беларусь!» і абазначэнне года выпуску - 2018.

Манеты выраблены з латуні. Агульны наклад - 100 асобнікаў.