На маёмасць Юрыя Авяр'янава не могуць знайсці пакупнікоў

Патэнцыйных пакупнікоў адпужвае высокі кошт.

Пару тыдняў таму адбыліся чарговыя таргі для продажу комплексу маёмасці ЗАТ «Растэм», уладальнікам якога з'яўляецца бізнэсовец Юрый Авяр'янаў, піша nv-online.info.

У канцы снежня 2016 года Эканамічны суд Менска прызнаў ЗАТ «Растэм» эканамічна неаплатаздольным, у дачыненні да ЗАТ уведзеная санацыя і зацверджаны яе план. Тэрмін санацыі - да 28 чэрвеня 2018 года.

Юрыя Авяр'янава 18 студзеня затрымалі ў Берліне, цяпер ідзе працэдура экстрадыцыі - бізнэсовец у Беларусі абвінавачваецца ў няплаце падаткаў.

На нядаўнія таргі былі выстаўленыя сталічны парк забаў «Дрымлэнд» (пачатковы кошт аб'екта - 29 186 000,00 рублёў (без ПДВ)), а таксама «Аграфірма Ілля», якая знаходзіцца ў Вілейскім раёне (былы калгас прадаецца за 6 740 100 рублёў).

Таргі што да «Аграфірмы Ілля» ўжо адбыліся летась - тады пакупнікоў не знайшлося. На гэты раз кошт аб'екта знізілі на 10 адсоткаў, аднак гэта таксама не прынесла ніякага выніку - пакупнікоў лот не зацікавіў, па-ранейшаму не паступіла ніводнай заяўкі.

Антыкрызісны кіраўнік распавядаў, што да аграфірмы Авяр’янава прыглядаліся кітайскія інвестары, якія прасілі значна знізіць кошт. Але і цяперашні кошт, мабыць, кітайскіх прадпрымальнікаў не задаволіў...

Журналісты пацікавілася ў арганізатара аўкцыёну ТАА «Франдэра», які лёс чакае маёмасць Авяр’янава далей?

«Гэта ўжо як вызначыць кіраўнік, - адказалі прадстаўнікі «Франдэры». - Магчыма, адбудуцца паўторныя таргi, а кошт маёмасці будзе зніжаны. Колькі можна праводзіць таргі? Кіраўнік павінен узгадніць гэтыя пытанні са сходам крэдытораў, і ўсё будзе залежаць ад іх пастановы...»

Нагадаем, што з заявай аб прызнанні ЗАТ «Растэм» банкрутам звярнуўся ВТБ-банк. Сярод крэдытораў значацца і некаторыя іншыя вядомыя банкі.