Магілёўцу прыйшоў «ліст шчасця» за не пройдзены ТА?

У сеціве з'явілася цікавая копія дакумента з пастановай аб накладанні спагнання.

Насцярожанае чаканне моманту, калі адсутнасць тэхагляду (а заадно і нясплачаны дарожны збор) змогуць фіксаваць у аўтаматычным рэжыме, назіраецца сярод кіроўцаў з вясны мінулага года, піша onliner.by.

Тады хтосьці пусціў слых, што камеры наладзяць на фіксаванне наяўнасці допуску да руху па дарогах. Не так даўно зноў загаварылі на гэтую тэму, у сетцы нават з'явілася копія дакумента, падобнага на «ліст шчасця», у ім пазначана: «Адсутнасць допуску зафіксаваная адмысловай прыладай у аўтарэжыме». У ДАІ і ЗАТ «Бяспечныя дарогі Беларусі» называюць гэта хлуснёй».

«Пастанова»

Храналогія з'яўлення выявы ў сеціве такая. Начальнік ДАІ Магілёўскай вобласці Міхаіл Неўмяржыцкі заявіў у нататцы, апублікаванай на сайце аблвыканкама: «Цяпер кіроўцы не змогуць утаіць не прышпілены рэмень або адсутнасць тэхагляду — камера будзе счытваць усе адміністрацыйныя правапарушэнні». З ягоных слоў, такія камеры дазволяць фіксаваць парушэнні хуткаснага рэжыму, невыкананне разметкі, праезд на чырвонае святло, не прышпілены рэмень і многія іншыя парушэнні ПДР.

«Таксама яны дапамогуць у пошуку сагнаных аўтамабіляў, бо змогуць счытваць рэгістрацыйны знак аўто, аператыўна апрацоўваць гэтую інфармацыю і перадаваць яе на пульт кіравання, — заўважыў спікер. — Першыя камеры цяпер мантуюць на адным з самых загружаных скрыжаванняў горада — на скрыжаванні вуліцы Першамайскай і праспекта Міру. Калі ў тэставым рэжыме відэакомплекс паспяхова сябе зарэкамендуе, сёлета на вуліцах Магілёва з'явіцца блізу 10 такіх камер».

Журналісты наўмысна праігнаравалі гэтую навіну, не сталі распаўсюджваць гэтую інфармацыю. Справа ў тым, што фіксаваць камера можа ўсё, што заўгодна, аднак наступствы для аўтаўладальнікаў (тыя самыя «лісты шчасця») прыходзяць толькі ў выпадку парушэнняў правілаў паркоўкі і невыканання хуткаснага рэжыму. Проста таму, што менавіта гэтыя два пункта пазначаны ў КаАП («фіксацыя працуючымі ў аўтаматычным рэжыме спецыяльнымі тэхнічнымі сродкамі, якія маюць функцыі фота - і кіназдымкі, відэазапісу», калі казаць паводле літары закона). За іншыя парушэнні ПДР, зафіксаваныя камерамі, пакарання быць не павінна: не стае заканадаўчай базы. Нядаўнія змены ў КаАП і ПВКаАП не закранулі пазначаную тэму. Заўважым, аб штрафах і «лістах шчасця» ў заяве начальніка рэгіянальнага ДАІ нічога не сказана.

Праз крыху больш чым тыдзень пасля публікацыі на сайце Магаблвыканкама ў сеціве з'явілася выява паперы, названай пастановай аб накладанні адміністрацыйнага спагнання. Ніякіх пячатак на ёй няма, толькі рукапісны подпіс. Фота прыцягвае ўвагу фразай «Адсутнасць допуску зафіксаваная спецыяльным тэхнічным сродкам у аўтаматычным рэжыме».

Рэакцыя ДАІ і ЗАТ «Бяспечныя дарогі Беларусі»

У СЗАТ «Бяспечныя дарогі Беларусі», якая займаецца эксплуатацыяй Адзінай сістэмы фотафіксацыі парушэнняў ПДР, тут жа адкінулі здагадкі аб тым, што дакумент можа быць сапраўдным: «Ніякіх пастановаў з нагоды пройдзенага тэхагляду і адсутнасці допуску да руху па дарогах не можа быць. Тэхнічную магчымасць мы ўжо маем, аднак такую працу не праводзім. Ва ўсякім выпадку такія ініцыятывы не ўваходзяць у нашу кампетэнцыю, а заявак ад ДАІ на такую дзейнасць не прыходзіла».

У ДАІ Магілёўскай вобласці ўважліва разгледзелі дакумент і выявілі на ім (пры шматразовым павелічэнні) прыкметы фотарэдагавання. «Хтосьці проста зрабіў гэтую паперу і размясціў у сеціве, — выказалі здагадку інспектары. — У тэксце бянтэжыць падвойнае ўжыванне слова «зафіксаванае» і памылка ў суме штрафу (1 б. а. = 24,5 рубля). Акрамя таго, камеры на вул. Першамайскай у Магілёве пакуль не ўсталяваныя. Калі з'явяцца, будуць працаваць у выпрабавальным рэжыме. У кожным выпадку штраф за зафіксаваны на камеру не пройдзены ТА немагчымы, пакуль не ўнесеныя змены ў заканадаўства».