Расейская кампанія падала ў Вашынгтон пазоў супраць Беларусі

Пазоў накіраваны ў Міжнародны цэнтр урэгулявання інвестыцыйных спрэчак у Вашынгтоне.

Расейская кампанія "Гранд Экспрэс" падала арбітражны пазоў да Беларусі ў Міжнародны цэнтр урэгуляванні інвестыцыйных спрэчак (ICSID) у Вашынгтоне. Пра гэта tut.by распавялі інфармаваныя крыніцы і пацвердзілі ў судзе.

Пазоў быў зарэгістраваны 31 студзеня. Неўзабаве павінна быць утвораная судзейская калегія ICSID для разгляду патрабаванняў расейскай кампаніі.

Інфармацыя наконт спрэчкі застаецца канфідэнцыйнай, паведамілі крыніцы.

ICSID, заснаваны пад эгідай Сусветнага банка, з'яўляецца асноўным форумам для ўрэгулявання міжнародных інвестыцыйных спрэчак, якія ўзнікаюць у адпаведнасці з міжнародным правам. Пастанова ICSID будзе абавязковай для неадкладнага выканання.

Нагадаем, што кампанія «Гранд Экспрэс» валодала 74% акцый Асіповіцкага вагонабудаўнічага завода (АВЗ). Астатняя дзель належала Беларускай чыгунцы (БЧ). Партнёры хацелі пабудаваць завод вытворчай магутнасцю 2,5 тысячы грузавых вагонаў і 2 тысяч танк-кантэйнераў на год. Былі пабудаваныя корпусы і закупленае сучаснае абсталяванне. Пачаўся выпуск прадукцыі. Але ў 2015 годзе вытворчасць практычна спынілася. Улады Беларусі мяркуюць, што ў гэтым вінаваты расейскі акцыянер. У «Гранд Экспрэс» былі прэтэнзіі да беларускай чыгункі і беларускага ўраду ў частцы выканання ўзятых абавязанняў у закупцы вагонаў.

У выніку партнёры пасварыліся і пачалі шлюбаразводны працэс, яго ход не задаволіў расейскую кампанію. Спробы «Гранд Экспрэс» дастукацца да ўладаў Беларусі і вярнуць сабе частку актываў не прынеслі выніку.

У сакавіку 2017 года АВЗ быў прызнаны банкрутам, і ў дачыненні да яго адкрыта ліквідацыйная вытворчасць.

У снежні мінулага года стала вядома аб пазове расейскай юрыдычнай кампаніі «Параллель.ЮК» да Рэспублікі Беларусь у Міжнародны камерцыйны арбітражны суд пры Гандлёва-прамысловай палаце Расеі. Гэтая структура была звязана з уладальнікамі «Гранд Экспрэс» і стала крэдыторам АВЗ пасля таго, як выкупіла завінавачанасці аднаго з расейскіх банкаў.

Журналістам пакуль не ўдалося атрымаць каментары ва ўдзельнікаў судовых спрэчак.