Фінансавыя рынкі супакойваюцца: на біржах ЗША адзначаны рост

Еўрапейскія рынкі таксама дэманструюць рост.

Амерыканскія біржы ў сераду адкрыліся ростам на фоне стабілізацыі рынкаў пасля трохдзённых хваляванняў. Акцыі прамысловых кампаній растуць, рытэйлеры і іншыя кампаніі спажывецкай сферы таксама ўмацоўваюць пазіцыі. Еўрапейскія рынкі таксама дэманструюць рост, піша «Голас Амерыкі».

Адкрыўшыся невялікім паніжэннем, большасць акцый прадэманстравала рост ужо ў першыя хвіліны таргоў. На Нью-Ёркскай біржы кампаній, якія выявіліся ў плюсе, было ўдвая больш, чым у мінусе.

Індэкс Standard&Poor's 500 вырас на 19 пунктаў або 0,7 адсотка, дасягнуўшы адзнакі 2 714 да 10:15 раніцы паводле ўсходняга часу. Прамысловы індэкс Dow Jones дадаў 255 пунктаў або 0,9 адсотка, падняўшыся да 25 133.

Індэкс Nasdaq вырас на 17 пунктаў або 0,3 адсотка да 7 133. Пасля рэзкай дынамікі апошніх трох дзён S&P 500 на 5,5 адсотка ніжэй нядаўніх рэкордных паказчыкаў, дасягнутых 26 студзеня.

Сусветныя рынкі ў сераду працавалі ў значна больш спакойным рэжыме. Індэкс DAX ў Нямеччыне дадаў 1,4 адсотка, а брытанскі FTSE 100 - 1,8 адсотка. Індэкс CAC 40 у Францыі вырас на 1,5 адсотка. Ганконгскі Hang Seng упаў на 0,9 адсотка, а японскі Nikkei 225 закрыўся павышэннем на 0,2 адсотка. Паўднёвакарэйскі Kospi ўпаў на 2,3 адсотка.

Нягледзячы на тое, што рынкі агулам супакоіліся, інвестары па-ранейшаму знаходзяцца ў нервовым напружанні. Індэкс VIX, які адлюстроўвае чаканні інвестараў з нагоды валацільнасці, на гэты момант знаходзіцца на адзнацы 21 - амаль удвая вышэй, чым два тыдні таму. Раніцай у аўторак ён пераскочыў адзнаку 50.

Кошт амерыканскай эталоннай нафты ў Нью-Ёрку падняўся на 49 цэнтаў да 63,88 даляра, а нафта маркі Brent у Лондане вырасла ў кошце на 86 цэнтаў да 67,72 даляра.

Курс даляра да ены ўпаў са 109,33 да 109,22, еўра да даляра - з 1,2392 да 1,2340.