Шахцёры, якія апынуліся пад завалам на «Беларуськаліі», загінулі

Разборка завалу ў рудніку спыненая.

Дзмітрый Валько і Максім Іваноў, якія апынуліся пад завалам шахты на «Беларуськаліі», загінулі. Пра гэта паведаміла салігорскае выданне autorun.by і пацвердзілі крыніцы tut.by. Афіцыйнага пацвярджэння інфармацыі пакуль няма.

Як паведамляе autorun.by, разборка завалу ў рудніку 3-га рудаўпраўлення спыненая. Паводле стана на 1.00 11 сакавіка, з-пад завалу вызвалены самаходны вагон, за якім былі знойдзены целы шахцёраў. Абследаванне горнай тэхнікі паказала, што абсталяванне адключана ад гідрапрывада.

Як раней паведамілі на «Беларуськаліі», 9 сакавіка на падземным горным участку №10 рудніка 3-га рудаўпраўлення, у змену з 11.50 да 18.50, пры выкананні комплексам ПКС-8 №4 засечкі на тэхналагічную збойку 22б заходняга слупа гарызонту -620 м адбыўся раптоўны выкід солі і газу.

Інтэнсіўнасць выкіду склала парадку 600 м³ горнай масы. Праходчы камбайн і самаходны вагон апынуліся цалкам засыпаны выкінутай пародай. Пад завал патрапілі машыніст горных выемачных машын Максім Анатольевіч Іваноў, 1973 года нараджэння, і горнарабочы вычышчальнага забою Дзмітрый Анатольевіч Валько, 1985 года нараджэння.

10 сакавіка паведамлялася, што Салігорскі раённы аддзел Следчага камітэта распачаў крымінальную справу паводле факта парушэння правілаў бяспекі горных работ (арт. 303 Крымінальнага кодэкса Рэспублікі Беларусь). Следчыя адбіраюць вытворчую і тэхнічную дакументацыю, якая рэгламентуе парадак правядзення гэтых відаў горных работ, дапытваюць работнікаў і службовых асоб прадпрыемства, выяўляюць прычыны таго, што адбылося.