У Непале пацярпеў катастрофу пасажырскі самалёт

Лайнер з 80 асобамі на борце загарэўся пры пасадцы ў аэрапорце Катманду.

У міжнародным аэрапорце Трыбхуван каля непальскай сталіцы Катманду пры пасадцы загарэўся пасажырскі самалёт. Пра гэта паведамляе мясцовае выданне Setopati.

СМІ паведамляюць, што на борце магло знаходзіцца да 80 чалавек.

Інфармацыю пра інцыдэнт пацвердзіў прадстаўнік мясцовай паліцыі. Лайнер належыць авіякампаніі US-Bangla Airlines і здзяйсняў рэйс са сталіцы Бангладэш - Дакі. Паводле звестак Setopati, згарэлы самалёт быў лайнерам Bombardier Dash 8 Q400.

Выданне Katmandu Post са спасылкай на мясцовую паліцыю паведамляе, што падчас пасадкі самалёт выкаціўся за межы ўзлётна-пасадачнай паласы і апынуўся на футбольным полі блізу аэрапорта. Пасля гэтага самалёт загарэўся.

На месцы катастрофы бачны вялікі слуп дыму. Фатаграфію з месца інцыдэнту ў Twitter апублікавалі відавочцы.

Міністр у справах турызму Непала Сурэш Ачар’я паведаміў што экстраным службам атрымалася выратаваць з агню 17 пасажыраў, яны дастаўленыя ў шпіталь. Паводле звестак уладаў, у выніку аварыі ёсць ахвяры, іх дакладная колькасць пакуль невядомая.

На фотаздымках, зробленых відавочцамі, відаць, што пажарнікам удалося патушыць агонь, аднак фюзеляж самалёта амаль цалкам згарэў.