У Ваўкавыску ўспыхнула эпідэмія адру?
- 13.03.2018, 9:23
- 13,055
У горадзе зарэгістравана ўжо 20 выпадкаў захворвання.
Лекары зарэгістравалі ў Ваўкавыску ўжо 20 выпадкаў адру. Такую лічбу ў гутарцы агенцтву БелТА назвала намесніца начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан.
"На сёння ў Ваўкавыску пацверджана 20 выпадкаў захворванняў на адзёр. За людзьмі, якія былі ў кантакце з хворымі, вядзецца медыцынскае назіранне. Гэта дазваляе своечасова выявіць захворванне і пачаць лячэнне пацыентаў. Сярод кантактных жыхароў новых выпадкаў адру не выяўлена", - падкрэсліла Карабан.
Паводле ейных слоў, большасць выпадкаў захворвання выяўлена ў тых, хто не быў прышчэплены.
Падтып захворвання, зарэгістраваны ў Ваўкавыску, раней не быў зафіксаваны ў Беларусі. Яго фіксавалі ў розных краінах Еўропы, у тым ліку ва Украіне. Таму спецыялісты мяркуюць, што вірус быў завезены з нейкай еўрапейскай краіны.
Прадстаўніца Міністэрства аховы здароўя падкрэсліла, што адзіны навукова даведзены спосаб прафілактыкі захворвання - прышчэпка. Яе варта зрабіць найперш тым, хто часта выязджае за мяжу.
У Ваўкавыску адкрылі дадатковы пункт прышчэпак, які працуе з 8.00 да 20.00.