Вараць локшыну ў чарзе: як беларусы здабываюць кватэры па $1047 за метр

Баталіі разгарэліся каля дома на вуліцы Скрыпнікава ў Менску.

Першым шчасліўчыкам пашанцуе зарэзерваваць кватэру сёння, астатнія вымушаныя чакаць выхаду другой дэкларацыі аб доме. Праўда, калі яна выйдзе, дакладна ніхто не ведае, гаворыцца ў рэпартажы журналіста realt.by:

«Нагадаем, што кошт квадратнага метра кватэр для грамадзян, якія не маюць патрэбы ў паляпшэнні жыллёвых умоў, склаў 2050 рублёў, або $1047 (паводле курсу Нацбанку на 7 сакавіка).

«Аднапакаёўкі» каштавацьмуць дольшчыкам прыкладна $47 200, «двухпакаёўкі» - $63 300 і «трохпакаёўкі» - $81 600. Першапачатковы ўнёсак складае 30% ад кошту кватэры.

Праектная дэкларацыя дома ДВА «Мінскбуд» у мікрараёне №3 у межах вул. Прытыцкага - Скрыпнікава - Адзінцова - Лабанка апублікаваная ў газеце «Звязда» 7 сакавіка, напярэдадні жаночага свята. Але, як выявілася, чарга па 28 кватэр на 2-5-м паверхах сфармавалася яшчэ да выхаду дэкларацыі. Назваць дакладную дату складана. Адны «спісачнікі» кажуць, што спісы сталі весці 6 сакавіка, іншыя - што 5 сакавіка.

На пытанне, а як жа яны даведаліся загадзя аб выхадзе праектнай дэкларацыі, быў адказ, што ёсць свае крыніцы атрымання інфармацыі.

Першай дзясятцы або дваццатцы «спісачнікаў», якія сёння напішуць заявы на кватэры, давялося адзначацца як мінімум тыдзень. Але канчатковы спіс быў сфармаваны ўчора а 13 гадзіне. Усю ноч трэба было хадзіць і адзначацца, каб не страціць сваю чаргу. Сёння ўранку зверыліся, падалі спіс у «Мінскбуд» і занялі абарону на браме, каб «вораг не прасачыўся».

Прынамсі, першых навасёлаў - сямейную пару, якая прыйшла ў каб. 311 па ключы ад сваіх новых кватэр, не прапусцілі. Астатнім навасельцам давялося паказваць дакументы на кватэры і пацвярджаць, што да гэтай чаргі яны не маюць ніякага дачынення.

А палове на дзевятую з будынка выйшаў ахоўнік і запрасіў зайсці першых трох чалавек.

Праз хвілін 15-20 запрасілі чацвёртага-пятага чалавека. Прадавец кватэр, мабыць, улічыў тое бязладдзе, якое адбывалася пад дзвярыма УКБ раней, і наважыўся навесці парадак.

Пасля прыходу да будынка «Мінскбуда» а 8.00 журналіста Realt.by накіравалі ў «хвост» чаргі і прапанавалі там запісацца на другую партыю кватэр, якія будуць прадавацца пасля выхаду другой дэкларацыі.

- А калі выйдзе дэкларацыя? - задаю пытанне.

- Можа, праз месяц, - адказваюць з чаргі.

- А можа, і праз два, - удакладняе маладзён Сяргей.

- Што вы робіце ў гэтай чарзе? - задаю пытанне Сяргею.

- Мы адсочваем сітуацыю, маніторым і збіраемся набываць у доме кватэры, калі ў другой дэкларацыі нас задаволіць кошт і паверхі, - адказвае ён за сябе і іншых.

- Атрымліваецца, што вы ўжо не ўваходзіце ў лік прэтэндэнтаў на кватэры ў першай дэкларацыі? - задаю яму наступнае пытанне.

- У першай дэкларацыі мы не трапляем, але і прапанаваныя паверхі нас не цікавяць, - адказвае Сяргей.

- Дык усё ж, калі выйдзе другая дэкларацыя? Асабіста мне пра гэта нічога не вядома, - пытаюся я.

- Калісьці яна выйдзе, бо дом трэба прадаць, - кажа Сяргей.

- І вы ўвесь гэты час будзеце прыходзіць сюды і адзначацца ў спісах? - задаю я наступнае пытанне.

- Гэта не так складана. Мы беспрацоўныя, таму можам стаяць тут цэлымі днямі і адзначацца кожны дзень, - ці то ўсур'ёз, ці то жартам адказвае Сяргей. - Жывая чарга на гэты дом сфармавалася ўжо тыдзень таму.

Побач стаіць дзяўчына. Яна дапаўняе, што таксама ходзіць сюды тыдзень. Паводле яе слоў, «спісачнікі» тут нават локшыну варылі.

Яна таксама хоча набыць двухпакаёвую кватэру ў гэтым доме.

- З верасня мінулага года я хаджу вакол гэтай будоўлі, на маіх вачах дом вырас з зямлі. Мяне задавальняе гэты раён, для мяне гэта важна, - кажа дзяўчына.

- І вы будзеце кожны дзень з Каменнай Горкі ездзіць сюды і адзначацца? - задаю я ёй пытанне.

- А што рабіць? З неба нічога не падае, на жаль, - адказвае яна.

P.S. А 14.00 у аддзеле продажу ў ДВА «Мінскбуд» сказалі, што заявы прынятыя на ўсе кватэры».