Шэйман даў справаздачу перад Лукашэнкам аб выніках візіту ў Зімбабвэ

Тавараабарачэнне паміж краінамі складае 19 мільёнаў даляраў.

Лукашэнка ў аўторак прыняў з дакладам кіраўніка спраў прэзідэнта Віктара Шэймана. Як паведамляе прэс-служба Лукашэнкі, на сустрэчы размова ішла пра перспектывы пашырэння эканамічнага супрацоўніцтва Беларусі з дзяржавамі афрыканскага кантынента. Напрыклад, Шэйман далажыў аб выніках свайго візіту ў Зімбабвэ. Краіну ён наведаў «на даручэнне Лукашэнкі», піша tut.by.

Прынамсі, адбыліся перамовы з прэзідэнтам Зімбабвэ Эмерсанам Мнангагва, а таксама першым віцэ-прэзідэнтам, міністрам горнай здабычы і развіцця здабыўной галіны, старшынём Рэзервовага банка, міністрамі замежных спраў і міжнароднага гандлю, сельскай гаспадаркі, транспарту і развіцця інфраструктуры, вышэйшай адукацыі, развіцця навукі і тэхналогій.

Бакі дасягнулі дамоўленасці і падпісалі кантракты на суму амаль 58 млн даляраў, у тым ліку ў пастаўках беларускіх трактароў на 43 млн даляраў і тэхнікі для лясной гаспадаркі на 15 млн. Гаворка ішла таксама аб стварэнні зборачных вытворчасцяў беларускай сельскагаспадарчай і горназдабыўной тэхнікі.

Акрамя таго, Зімбабвэ зацікаўленае ў закупцы беларускіх угнаенняў, рыхтуецца кантракт на суму блізу 10 млн даляраў.

Бакі абмеркавалі таксама стварэнне супольных прадпрыемстваў для перапрацоўкі мяса і малака, у галіне будаўніцтва і транспарту. Зімбабвэ гатовая выкарыстаць беларускі досвед у рэкультывацыі зямель і ірыгацыі засушлівых раёнаў. Са слоў Віктара Шэймана, прапрацоўваюцца магчымасці двухбаковага супрацоўніцтва ў галіне электраэнэргетыкі.

Паводле звестак Белстата, летась беларускі экспарт у Зімбабвэ вырас у 86 разоў - да 19 млн даляраў.