Беларускія кантрабандысты паспрабавалі на квадракоптэры пераправіць цыгарэты ў Польшчу

Да квадракоптэра быў прымацаваны груз з 300 пачкаў.

Усё здарылася 9 сакавіка. За паўкіламетра ад беларуска-польскай мяжы берасцейскія памежнікі ўбачылі і затрымалі квадракоптэр, да якога быў прымацаваны груз з 300 пачкаў цыгарэт. Паводле інфармацыі памежнага камітэта, кантрабандысты - грамадзяне Беларусі, ім ад 30 да 40 гадоў, піша Onliner.by.

- На гэты момант з імі ідзе разбіральніцтва ў рамках адміністрацыйнага працэсу. Яны даюць тлумачэнні ў сувязі са сваімі дзеяннямі, - распавёў Onliner.by афіцыйны прадстаўнік Дзяржпамежкамітэта Антон Бычкоўскі. - Далей яны будуць прыцягнутыя да адміністрацыйнай адказнасці за парушэнне памежнага рэжыму. Гэта частка 1 артыкула 23.30 КаАП. Пакаранне паводле гэтага артыкула прадугледжвае штраф ад 50 да 100 базавых адзінак (ад 1225 да 2450 рублёў - заўв.).

Таксама кантрабандысты могуць патрапіць пад артыкул 14.1. КаАП «Перамяшчэнне тавараў праз мытную мяжу Еўразійскай эканамічнай саюза па-за вызначанымі заканадаўствам месцамі або ў неўстаноўлены час». Гэта яшчэ ад 30 да 50 базавых (ад 735 да 1225 рублёў).

Акрамя гэтага, ім пагражае пакаранне паводле артыкула 18.41 таго ж кодэкса. Гэта яшчэ 20 базавых (490 рублёў). Максімальнае пакаранне, якое можа пагражаць кожнаму з правапарушальнікаў, гэта штраф 4165 рублёў.